U Nongialam barim ka United Democratic Party (UDP) u bah Bindo M Lanong, u la ong ba ha ka jingpeit jong u, ka UDP kam i don lyer shuh.
U bah Bindo u dei uwei na kiba ia don bynta ban seng ia ka UDP, u la ia jngai noh bad kane ka seng ha shwa ka elekshon MLA 2023, hadien ba ki nongialam ka party kim shym la ai tiket ia u ban iakhun na Nongkrem konstitwensi bad kane ka la nang pynjngai shuh ha shwa ka ilekshon MP, hadien ba kim shym la sngap ia ka jingthoh jong u, ba u kwah ban iakhun ia ka MP.
Ha ka jingiakren mynta ka sngi, u bah Bindo u la ong ba wat u kyrtong shimet (independent) u lah ban ioh ia ka vote kumba ioh ka UDP ha kane ka ilekshon MP ba dang dep shen.
“Haba nga peit nga i kumba ka UDP kam i don lyer shuh namar ka jingioh vote jong ka ha kane ka ilekshon MP, ka long ba wat u kyrtong shimet ruh u lah ban ioh,” la ong u bah Bindo.
Ha ka jingiohi jong u, i kumba ka party UDP mynta ka la poi shaba kut mynta ka kynti.
U la ong ba ka jinghiar ka UDP lehse ka lah ban dei namar ba u nongialam u dei u ba dang thymmai bad um dei u shemphang ha ka kam ban shakri paidbah.
“Ka jingpyniaid ia ka seng sain hima party kam dei kaba jem, ka eh ban pyniaid da ki briew ba thymmai ki bym pat slem ha ka kam synshar,” ula ong.
Ula bynrap, “Ngi te ngi la la iakit naduh ka tynrai ia ka seng naduh ba seng ia ka Unit bad ngi poi suki jai ha ki District bad Central, hynrei kiba wan mynta u shu wan beit najrong beit, u shong beit jnung hajrong u mawsiang. Ha kano ka rukom un peit ia ka party, namar ka kam jong u ka dei ka kam khaii (business) bad ka long 100 percent u nongkhaii.”
U nongialam ba radbah ka UDP u bah Bindo ula ong ba ka long kaba eh ia ka UDP ban khie khlieh biang.
Haba twad jingmut kumno kan khlieh biang ka UDP, ula ong ban pynkhie im biang ia ka UDP donkam ia ki nongialam kiba tbit bad kam long kaba jem ban ialam ia ka party ne ia ka jylla.
Haba kylli la u don ka jingthmu ban iakhun ia ka ilekshon MDC u la ong ba ia mynta um pat lah ban ong kumno kumno namar dang ha kane naduh u 2003 ula pan tiket ban iakhun ia ka MP hynrei um shym la ioh jubab tad haduh ba un da phah shithi weng ba um treh shuh ban iakhun ia ka MP namar la dier ka por.
“Nga la long MDC la 7 sien bad nga la poi lut sha baroh ki 36 tylli ki konstiwensi ha ri khasi Jaintia, 29 tylli ki konstiwensi ha ri khasi kynthup shaduh ki shnong lyngngam ki shnong kyndong bad sha ri Bhoi ruh nga la poi lut. Nga don briew lut ha man kawei pa kawei ka konstiwessi,”u la bynrap.
Shuh shuh haba kylli halor ka jingpynlan ia ka ilekshon MDC, u bah Bindo ula ong kan bha hi lada lah ban pynbeit thymmai ia ki konstiwensi khnang ba ki vote kin ia wan marjan.
Ula ai nuksa kum ka mawlai konstiwensi ka la heh katba ka Laban ka don tang 6000 namar ki bar jylla kim ioh ban vote ha ka MDC.
“Kan bha hi lada pynbeit khnang ban nym ia jngai bad ka nym heh than, tangba ki dei ban kham pynkloi,”ula ong.
