U Joint Secretary ka All India Congress Committee (AICC) u Matthew Anthony u la kynthoh ba ka ‘One Nation, One Election’ lane kawei ka Ri, kawei ka ilekshon kan ym poi shano shano, lada iaid katkum ka ain namar donkam ban ioh jingmynjur palat 50% na ki Jylla ka Ri. Lah ban kdew ka kynhun Myntri Sorkar Pdeng dang shen ka la mynjur ia ka ‘One Nation, One Election’ lane kawei ka Ri, kawei ka ilekshon. U Anthony ula kam ba ki paidbah ki jied ia ki National Party ha ki ilekshon MP hynrei ha ki ilekshon Jylla ki dang bun ki paidbah kiba thep ha ki Party Jylla bad ha ki ilekshon synshar District ne Shnong, jan baroh ki paidbah ki jied ia u briew shimet.
“Ka Ri india ka don bun jait ki ilekshon, kaei ka jingmut ban pynkhleh lang ia ki. Lada ka Sorkar ka shim khia bha ia kane, te balei ki pynlong ia ka ilekshon Lok Sabha ha bun tylli ki wat Phase, balei ki dang leh ia ki ilekshon Jylla (Assembly) ha kine ki bun tylli ki Phase” la buh jingkylli u Anthony.
U Anthony ula kam ka kaiphod survey jong ka IDFC 2015, ka ong ba 77% ki paidbah kin thep vote ia kajuh ka party lada ia ka jylla bad ia ka ilekshon sha ka iing dorbar thawain la pynlong lang ha kajuh ka por bad lada pynlong kyrpang, kumba 61% kin thep vote ha ka rukom kaba pher. U la kynnoh ka rai jong ka Sorkar Pdeng ba ialam da ka BJP ka kdew shai ba ka BJP ka kwah ban don ia ka jingsynshar jong President.
