Ka jingitynnad bad ka jingpawnam ka Mawphanlur ha u lum Mawthadraishan ka Eastern West Khasi Hills, ka la pyndiaw dpik dik dik ia ki nongleit nongwan bad khamtam ia ki nongpyniaid ia ka kam jngohkai bad ka daw ka dei namar ba ka surok kaba kiew na iew Markasa arted ka la sniew tasam haduh katta katta.Ha ka jingleit lum khubor la sakhi ba ka surok ka la sniew shisha naduh ka tyndong ban rung ban kiew sha kliar ka Mawphanlur. Ha kiba bun ki jaka, ki kali ki hap ban wad jaka iaid na jaka kaba bha ban pynmareh ia ki taiar kali namar ba bakla tiak, la rew pynban jrain, tdum tdam sha khrum kali khamtam kiba tbian khrum.
Kane ka surok ka don kumba 5 km eiei na Markasa ban poi sha kliar lum, ha kaba ki pung kiba jyrngam bad khuid ki khring ia ki nongwankai nalor ka jingitynnad bad shynna sawdong ban ioh sha them khamtam haba shai bha ka mariang. Ha ka jingshisha, la shna bad siang rong ia kane ka surok la katto katne snem mynta hynrei na ka jingther u slap, bad ka jingtuid ka um ka la khlong ia ka surok nalor ka jingset ki nala, kaba la wanrah ka jingjot kaba la buh jingeh pat ia ki paidbah.
ka jingsniew ka surok ka la pynkhohnioh ia ki nongwankai ban leit jngohkai namar ba jaka ban sngew tynnad ban peitkai ia ka mariang ba ithiang, kila jrem pynban ka met ka phad. U lum Mawthadraishan u jrong 1,924.5 metres ne 6,314 phut na sla duriaw bad u dei u lum ba ar ha ka jingjrong ha Meghalaya.
