Erlangthari ha Jirang, mynsaw 2 ngut

Kumba 44 tylli ki iing ki julor na ka jingwan ka ‘erlangthari kaba jur ryngkat bad u slap ha ki shnong kiba hap hapoh ka Jirang konstitwensi mynta ka sngi, la iathuh ka khubor kaba la iohlum na u Block Development Officer ka Jirang C & RD Block u Dr. Pabitra R Hajong. Utei u heh ophisar u la pyntip ba ha kane ka jingjia, kawei ka longkmie kaba la tip kyrteng kum ka Khuni Killing ka la mynsaw bad ki shnong kiba la shah ktah jur eh ha kane ka jingwan lynshop ka ‘erlangthari ki kynthup ia ka shnong Umsalani bad ka Umsaliang. Nalor kitei ki shnong la ioh jingtip ruh ba ka la don ruh ka jingshah pynjulor ki ing ki sem bad ki jingthung jingtep ha ka shnong Nongrim Jirang.

La ioh jingtip ruh ba ka surok kaba leit sha ka shnong Umsaliang, ka la shah khangdam syndon na ka jingshah pynkyllon jong kiba bun ki dieng ki siej ha ka ‘erlangthari kaba la wan kynsan kynsan mynta ka sngi. Halor kane ka jingjia shah lynshop ‘erlangthari, na ka liang jong u tei u BDO ka Jirang C& RD Block, u la bthah ia ki nongialam jong ki shnong kiba shah ktah ba kin lum jingtip halor ki jingjulor ha ki shnong ki thaw ki jongki bad kyntu ruh ia kito kiba shah pynjulor ia ki ing ki sem ba kin sah shwa shipor ha ki ing skul bad ba na ka liang ki bor sorkar ki dang ialeh ban pynbiang ia ki lad ai jingiarap ba kyrkieh.

Ha kane ka sngi la sakhi ruh ia ka jinghap jong u phria ha kiba bun ki shnong ki thaw jong ka thain Nongpoh uba neh kumba 5 minit eiei. Ha kane ka jingjia ar ngut ki longkmie tymmen ki la mynsaw jur na ka jinghap ki dieng ba rah ka eriong. Kane ka jingjia ka la jia ha ka por 3 baje janmiet hynne ka sngi u Blei.