a Sorkar Jylla ka la rai ban mang lypa ka pisa T.35 lak kum ka Corpus Fund na ka bynta ban iarap ia ki nongthoh khubor ynda ki la shongthait na ka kam thoh khubor. Kane ka Corpus Fund ka dei ruh ban iarap iaki Nongthoh Khubor ha kano kano por ba ki iakynduh ia kino kino ki jingjia ba sngewsih ha ka jingim katba ki dang don ha ka kam. Ia kane la pyntip da u Myntri Rangbah ka Jylla u Conrad K. Sangma hynne ka sngi ha ka sngi rakhe ia ka sngi ba kyrpang jong ki nongthoh khubor ha ka ri India ne ka National Press Day. Haba kren sha ki lad pathai khubor u Conrad u la ong ba ka Sorkar Jylla naduh 2009 kala shim iaki sienjam ban iarap iaki nongthoh khubor.
“Ki skhim ka long ban iarap na ka bynta ka longiing longsem jong ki nongthoh khubor kiba la khlad noh kaba ngi ju ai jingiarap T.1 lak. Ia kane ka jingarap pisa mynta ngi la kyntiew na ka T.1 lak sha ka T.5 lak. Ngi ju ai jingiarap ruh T.50 hajar sha ki nongthoh khubor kiba ioh ia ka jingshitom kaba neh slem ha ka met bad ia kane ka jingiarap mynta ngi la kyntiew sha ka T.3 lak. Ka don ruh ka jingiarap kaba T.50 hajar sha ki nongthoh khubor ba la ju ai jingiarap haba ki iakynduh ia kino kino ki jingeh kiba kham jwat ha ka jingim na ka daw ka jingpang jingshitom. Ia kane ka jingiarap pisa ruh mynta ngi la kyntiew sha ka T.3 lak,” la ong u Conrad.
U Conrad u la ong ruh ba ka Sorkar Jylla ka kwah ban don ka jingiatreilang ba khamjan hapdeng ki lad pathai khubor, ki nongthoh khubor bad ka tnat Information and Public Relations (IPR). “Ngin sa thaw iaka Committee ka ban khlieh da u Commissioner & Secretary lane u Principal Secretary bad ha kane ka Committee yn don 2-4 ngut napdeng ki Nongthoh Khubor” u la ong. U Conrad u la ong ba kane ka Committee kan khmih ruh ia ka jingpyndonkam ia ka Corpus Fund na ka bynta ka bha ka miat ki Nongthoh Khubor.
