Ka Dorbar Niam jong ka Seiñraij Jowai hynnin ka sngi u Blei ka la pynlong ia ka Dorbar ki Kñi bad “Ka Kchu Ka Siang” ki khun ka Raij Jowai ha madan kñia pyrthat, Dulong Poh-Hali, bad lyngba kane ka dorbar ka Seiñraij ka la pynkup burom ia ki Kñi ki Phra Kur Phra Kmai kiba don hapoh ka Raij Jowai bad kiba juh don bynta ha ki kam niam jong ka Raij.
Ka Seiñraij Jowai ha kane ka sngi ka la pynkup burom ruh ia ki Dolloi kiba la wan sakhi wan donlang na kylleng ki Elaka ka Rilum Jaiñtia ba kynthup ia u Dolloi naka Elaka Nangbah, Elaka Raliang, Elaka Shangpung, Elaka Mynso, Elaka Darrang, Elaka Nartiang, Elaka Nongtalang bad ka Elaka Nongjngi.
U Shape Paswet u Kñi ka Kur Paswet haba kren halor ka phang “I Chwar U Pa Pyrkhat Wa Pynskem Ya Ki Kñi Phra Kur Phra Kmai” ula pynsngew ia ka khana ba halor kumno la sdang ia ka shnong Jowai, bad ruh kumno la sdang ia ka lehniam Behdieñkhlam bad ha kano ka rukom ki Kur ki ioh bynta ha ki kam niam hapoh ka Raij Jowai.
U General Secretary ka Seiñraij, u Arwotki Sumer haba kren halor ka phang “I Dor I Pyrtuid Niamtre” ula batai ia ka jinglong kyntang ka Niamtre hapoh ka bri u hynniewtrep, bad ruh ka nongrim ba ka Niamtre ka ieng.
Na ka liang u President ka Seiñraij Jowai, u Hercules Toi ula kren hajrong ka phang “Ki Kñi Lyngba Ki Chnong Ki Raij Wa Ku Ka Niam Ka Rukom” ha kaba ula iathuh ia ki kamram jong ki kñi ban pyndep ia ka niam ha la ki jong ki jong ki ïing, ki shnong bad ki Raij.
U Dolloi ka Elaka Jowai, u Puramon Kynjing haba kren u iathuh ruh ba kane ka Dorbar Niam jong ka Raij Jowai ka la rai ban pynkhie im biang ia ka shad Pastieh Blai Ryngkaw bad ia kane ka Pastieh yn pynlong na Loom Mookhai bad pynkut ha Madan Blai Ryngkaw (Tpep Pale) Jowai bad ha ki por mynshwa la juh pynlong ar-lai sien ha ka shi rta u Dolloi.
Ha ka jingialang jong kane ka dorbar ba la pyniaid da u Pator ka Elaka Jowai, u Raymond Nartiang la ioh ki kyntien pdiang burom na u S. Siangbood u Langdoh ka Raij Jowai.
