Ha ryngkat ki ummat ka jingsngewsih hynne ka sngi la tep don burom ia u Myntri Rangbah barim ka Jylla u Salseng C. Marak.
Ia u Salseng C Marak la tep don burom ha u lum jingtep jong ka Gajingpara ha Resubelpara, North Garo Hills.
Ha shuwa kane ka Sorkar Jylla ka la pynlong ia ka jingleh burom khadduh ia ka met jong u Salseng C Marak ha Resubelpara Mini Stadium.
Ha kane ka sngi la donlang u Myntri Rangbah ka Jylla u Conrad K Sangma, u MP ka Tura u Saleng Sangma, u Dr Mukul Sangma lem bad kiwei ki heh Sorkar, ki MLA bad kiba haiing hasem bad ki paidbah ka thain.
Naka liang ki pulit ka jylla ki la ai ia ka salute ban leh burom ia ka met jong une u Myntri Rangbah barim ka Jylla ha shuwa ban leit on tep don burom ha lum jingtep ka Gajingpara kaba don ha Resubelpara, North Garo Hills.
Lah ban kdew ba u Salseng C Marak ula khlad noh ha ka 16 tarik u Nailar 2024 ha Civil Hospital Tura.
Na ka liang u Myntri Rangbah ka Jylla u Conrad K. Sangma ha kane ka sngi ula phah ka khubor sngewlem halor kane ka jingduh noh ia une u nongialam uba la noh synniang shibun ban kyntiew ia ka Jylla Meghalaya.
Ki nongkren ha kane ka sngi ki la pynpaw ia ka jingduh kaba khraw halor ka jingkhlad noh une u rangbah bad kum ki nongialam ki la pynpaw ruh ia ka jingsngewlem sha kiba haing ha sem bad kiba ieit bathoin kiba la duh noh ia une u rangbah nongialam.
Ki la pynpaw ruh wat lada um don shuh ha sla pyrthei, hynrei ki matti kiba ula buh ban kyntiew ia ka jylla Meghalaya kin iaisah junom bad kin iaid burom ia u kum u nongialam ba la leh shibun ki kam ba khraw ha rilum Garo bad ha ka jylla Meghalaya baroh kawei.
