Ha ka jingdonlang ka lok u Syiem Wickliffe la pyllait ia ka kot “Aiu Ngin Leh….Tang Shisien”

Ka shnong Rajai kaba don ha Bangladesh ka dei ka shnong ba basah u Syiem Khynnah ka Hima Nongstoin u Wickliffe Syiem, hadien ka jingmih noh jong u na Ri India bad ha ka 15 tarik u Lber 2024 u khun banyngkong jong u, u Andrew Joel Sohlamar uba dei u Organising Secretary ka Bangladesh Indigenous People’s Forum (BIPF) ula ioh ban pyllait paidbah ia ka kot ba la thoh da u bah Daniel Stone Lyngdoh kaba la ai kyrteng ‘Aiu Ngin Leh Ha Jingim Ba Tang Shisien’ bad Ia kane ka kot kaba don 8 Lynnong la pyllait paidbah ha Phyllaw iing sah jong u Wickliffe Syiem ha Rajai.

U Bah Daniel Stone Lyngdoh uba dei u nongiasaid ain jong ka iing bishar Supreme Court bad uba shong ha Shnong Mawkyllei hapoh Hima Mawiang ula iathuh ba u la shim por 48 sngi ban thoh ia kane ka kot ha ka jingiaid lynti jong u ha baroh kawei ka Ri India bad ha ki Ri ba marjan. U la iathuh ba ka daw ba u la thoh ia kane ka kot ka dei namar ka don ka jingkhot kaba pyni ba u Briew um lah ban wan phai ar sien ha kane ka pyrthei bad kane ka kot ka don ia ki jubab kiba ngi dei ban leh haba ngi im tang shisien ha kane ka pyrthei. U la iathuh ruh ba ia ka jingmih haba die ia kane ka kot yn noh synniang kum ka bai kot sha ki khynnah kiba duk kiba pule ha ki skul bad ki kolej.

U bah Andrew Joel Sohlamar haba kren kum u kongsan ula ong, “kane ka kot ka don ha ka ia Ki 4 tylli Ki bynta ba kynthup ia ka jingieid ia ka niam ka rukom, ka jingiaseng Ri, ka Jingieid ia la ka jait ka kynja bad ka jingieid ia ka mynsiem riewshlur. Kiwei pat kiba la iadonlang ha kane ka sngi nalor ki khasi kiba sah ha Bangladesh bad kiwei pat ki jaitbynriew la ia donlang ruh da i kong Relimai Sohlamar iba la 93 snem ka rta bad iba dei I kurim jong u Wickliffe Syiem.