Ka tnat Department of Post ka Sorkar India ha ryngkat bad ka Meghalaya Postal Division kala pynlong iaka ‘Philatelic Exhibition Meghapex 2024’ ha State Convention center. Kane ka ‘Philatelic Exhibition Meghapex 2024’ ka long ar sngi, kata ha ka 21 bad 22 tarik Risaw. Ha kane ka sngi la wan shim bynta daka Director General of Police (DGP) ka Kong Idashisha Nongrang, u Chief Postmaster Northeast Circle u Sanjiv Ranjan, u CEM ka KHADC u Bah Pyniaid Sing Syiem, ki MDC ba kynthup u Bah Lamphrang Blah, PN Syiem, ki nongshah khot sngewbha bad khynnah skul. Haka sngi plie iaka ‘Philatelic Exhibition Meghapex 2024’ la ioh ban pynlait paidbah ia ka Special Cover Jong ka Khasi Hills Autonomous District Council (KHADC). Haba kren sha ki ladpatahi khubor u CEM ka KHADC u Bah Pyniaid Sing Syiem u la ong ba kane ka program ka long ban pyni paidbah ia ki Stamp bapher bapher ki ba la pyndonkam naduh ki por kham mynshwa.
U Bah Pyniaid u la ong ba kane ka ‘Philatelic Exhibition Meghapex 2024’ ka long kaba kongsan namar lyngba kane ka Exhibition la ioh ban pynrung iaka KHADC hapoh ka Postal jong ka Ri India kum ka Special Cover kaba la Print 2000 tylli.”Ha kane ka ‘Philatelic Exhibition Meghapex 2024’ ngi la ioh ban ia soi ia ka Special Cover jong ka KHADC bad u Postal Master jong ka North East Circle, kaban phah sha ka National Museum sha Nongbah Delhi bad na ka Liang ka Post Office kan phah sha District Council ban ioh ban die ia kine ki Stamp bad ka Council ruh kan ioh ban pyndonkam ia kine ki Stamp” la ong u Bah Pyniaid.
U Bah Pyniaid u la ong ba ka jingioh rung ka KHADC haka Postal lyngba ka Special Cover kadei ka jingkyrkhu namar kane kan long ka jingithuh na ka Ri India bad ha kane ka Special Cover ka batai halor ka KHADC da ka ktien Hindi, English bad ka ktien Khasi kaba long kum shi bynta ban ioh ka jingithuh ia ka ktien Khasi. U CEM u la pyntip ba iaka Special Cover lah ban Print tang shisien bad kane kan wanrah jingmyntoi ia ki ba lum ia kane ka Stamp, namar wat mynta ka dor ka long T.50 hynrei hadien 15-20 snem ka dor jong ka Special Cover kan sa kiew dor.
