Ha ka jingïaid lynti jong ka Ïeng Rasong Village Organization, Umryngksai kaba la kynjoh sha ka 3 snem pura, mynta ka sngi ki dkhot jong kane ka VO ha ryngkat bad ki dkhot jong ki SHGs ka la ïoh ban lehkmen bad ban ot ïa u cake ban sah jingkynmaw bad ha kane kajuh ka sngi kane ka Village Organization ka la ïoh syndon ban khap ribon ban plie paidbah noh ïa ka ophis treikam kaba thymmai ka jong ka. Ha kane ka sngi la wan ban ïa don bynta lang ha kane ka jingleh kmen jong ki Longkmie da u bah Mayralborn Syiem MLA ka nongpoh kum u kongsan haka jingïadon lang u bah Balajied Rani MDC ka Nongpoh ha kaba na ka liang jong u kum u MDC u la ïoh ban ai sngewbha ruh da ki tiar sha ka VO bad la sakhi lang ruh da ka jingïadon lang u Bah K Kharshandi Rangbah Shnong Umryngksai, ki nongtrei jong ka Umling Block, NRLM, Ki nongkitkam jong ka VO ki SHGs bad kiwei kiwei.
Kum ban shu pynpaw, Ka Ïeng Rasong Village Organisation jong ka shnong Umryngksai ka la dep ban plie ïaka Ophis treikam ka jong ka ha u snem ba la leit kata haka sngi ba rakhe ïaka jingdap kaba 2 snem, Hynrei namar ka jingnang kiew sted jong ki kynhun SHGs kiba don hapoh ka shatri jong ka VO ka la pynkhap ngiah ha kapor ba long jingïalang ha katei ka ophis namar ka jingrit jong ka kamra. Na ka jingiohi jngai jong ki nongïalam ka VO bad ki Nong shynshar shnong ki la wat lad wat lynti ban pynioh ïaki skim na ka bynta ban tei ïaka ïing ophis kaba kham heh bad kaba kham kylluid bad dei ha kane ka sngi ba naka liang jong ki Nongïalam ka VO ki la ïoh syndon ban plie paidbah ïaka ophis treikam kaba thymmai jong ka ïeng Rasong VO lane ka Work Shed Cum VO Ophis ïakaba la tei haka jinglut kaba 7 lakh tyngka lyngba ka skim 100 sngi lane ka MGNREGA.
Haba kren ha katei ka jingïalang, Na ka liang u MLA nahi Mayralborn Syiem, u la ai jingïaroh naduh ki Nongïalam shnong bad ki Nongïalam jong ka Village Organisation kiba la lah ban kyntiew Ïa ka kam jong ka VO naduh ba la seng ïa ka. U la ong ruh, Ka jingnang roi sted ki SHGs hapoh ka VO ka pynpaw ïaka jinglah ban trei kam bha ki Nongïalam bad ki Dkhot jong ka bad haba ngi rakhe Ïa kane ka jingïaid lynti kaba 3 snem jong ka VO ngi dei ban kynmaw ïaki sienjat kiba la leit noh bad ngi dei ruh ban buh ïaka thong kaei ba ngin leh ha ki sngi ki ban wan na ka bynta ban nangkyntiew ïa ka VO.
Shuh shuh u la ong, ka Jingdon ki SHGs bad ka VO hapoh ka shnong ka ïarap ruh ban kyntiew ïaka ïoh kam ïoh jam jong ki longkmie ha kaba lyngba ka VO ki lah ban leh shibun jait ki kam ki ban lah ban kyntiew ïa ka lad ïoh kamai bad ka Sorkar jylla ka ju pynshlur ruh ïaki longkmie ban Ïa snohkti lang bad ki SHGs khnang ba kin lah ban ïeng ha la ki jong ki kjat. Haba kut ka jingkren u Bah Mayralborn u la kyntu naduh ki Nongïalam ka VO bad ki dkhot jong ki SHGs kiba don hapoh ka VO ba kin nang ai ïaki jingshakri kiba kham bha bad ruh ban Ïa don ïaka jingshaniah para dkhot khnang ba kan nym mih kano kano ka jingïa sngewthuh bakla.
