Ha ki 2 snem kurup drok ki pulit T.300 klur, kem palat 6 spah ngut

U Director General of Police ka jylla, u Dr LR Bishnoi  ula pyntip ki pulit ki la ioh kurup ia u Drok ba shongdor T.300 Klur kynthup ia u Drok Crystal Meth 14.2 Kg ba shongdor T.1.5 Klur shi kilo ha kine ki ar snem ba la dep. Haba kren ha ki nongthoh khubor, u DGP ula ong ha u snem 2022, ki pulit ki la rejistar 116 tylli ki mukotduma, ha u snem 2023 ki mukotduma ba la rejister ki la kiew 189 bad ha kine ki 2 bnai mynta u snem 2024 la rejistar 13 tylli ki mukotduma. Kiba shah kem ki long 234 ngut ha u snem 2022, 355 ngut ha u 2023 bad 25 ngut ha kine ki 2 bnai u snem 2024. “Naduh ka sngi ba nga wan trei, ki don 610 ngut kiba shah kem bad 10% ki dei kiba khaïï kynthei, 61ngut ki kynthei ki la shah kem bad kiba tam ki dei ki shynrang,” ong u Bishnoi. Ula pyntip ki pulit ki la ioh kurup 7.5 kilo u Heroin ha u snem 2022, 16.3 kilo u Heroin ha u 2023 bad mynta jan 1 kilo ha ki ar bnai u snem 2024. Ka jingioh kurup Heroin baroh ka long 26 kilo. Katba ka jingioh kurup kynja ka long 3987 kilo ha u snem 2022, 1400 kilo ha u 2023, katba ha u 2024 tang ha ki ar bnai ki la ioh kurup 4750 kilo kaba pyni ba ki ka jingioh kurup ka la kiew saw shah ha u snem ba la dep. U DGP ula iathuh ka jingioh kurup ia u dawai Yabba Tablet ha u 2022 ka long 19,000 tylli, ha u 2023 palat 60,000 tylli bad ha ki ar bnai u 2024 kumba 2000 tylli, katba kiwei pat ki jingdih pynbuaid ba sniew la ioh kurup kumba 16,928 tylli ha u 2022, ha u 2023 la ioh kurup 32,298 tylli bad 600 ha u 2024.

 U la ong, ba ka dei ha ka sien banyngkong ha ka histori ki pulit ka Meghalaya ba ki la ioh kurup ia u Drok Crystal Meth ba 14.2 kilo.”U Crystal Meth u dei u drok ba remdor. Ka dor jong u ha iew ka kot sha ka T.1.5 Klur shi kilo” ong u DGP. Katba ia ka dawai jyrhoh ula ong, ha u snem 2022 la ioh kurup 28,000 bilor, ha u 2023 la ioh kurup 88,000 bilor bad ha kine ki 2 bnai u 2024 la ioh kurup 112 bilor. U la iathuh ba ki pulit ki la ioh kurup 137 tylli ki Mobile Phone ha u 2022, 408 tylli ha u 2023 bad 30 tylli haduh mynta u snem 2024. U bynrap ba ki pulit Meghalaya ki la pynkheiñ ruh ia ka rekod ha ka jingioh kurup ia ka pisa, ha u snem 2022 la ioh kurup T.36 lak, ha u 2023 la ioh kurup T.45.6 lak bad ha u 2024 la ioh kurup T.60,000. Katba ia ki kali la ioh kurup 67 tylli ha u 2022, 157 tylli ha u 2023 bad ha kine ki 2 bnai u 2024 la ioh kurup 12 tylli. “Ha u 2022, hadien ka jingkhmih bniah ia ki jingkhein jong ka NDPS la shem ba ka jingtreikam ha ka jingkem ia ki nongdie drok ka long kaba la treikam bha ha ki 28 tylli ki police station hynrei ha u 2023, ka la kiew ka jingtreikam ki Police Station sha ka 30 tylli bad ha ki 2 bnai u snem 2024 ka la kiew sha ki 32 tylli ki police station,” ong u Bishnoi. U la iathuh haba khein ia ka jingioh kurup drok ha u snem 2022, ka long T.75 Klur, ha u 2023 ka long T.170 Klur bad mynta u 2024 ka long T.21 Klur bad baroh ka long T.300 Klur ha kine ki 2 snem ba la dep.

U la ong, ka jingioh kurup ki pulit Ri Bhoi ia u kynja 4,750 kilo u dei u kynja ba bha tam bad ki pulit ki dang pynlong ia ka jingtohkit halor kane. “Ka jylla ka don hapdeng ka jingma namar ba ka iajan bha bad ki thain kiba hap hapoh jong ka “Golden Triangle”. Mynshwa ka dei tang ka jaka ba shu iaid lyngba hynrei mynta ka dei ka ktem ban pyniaid iew” ong u DGP bad bynrap ba don ka jingkiew ha ki nongdih drok ha ka jylla bad ki pulit ki la shim ia ki lad ki lynti ban pynlong ia ki prokram ban pynshai paidbah khamtam na ka bynta ki samla, da kaba pynlong ia ki prokram ha ki skul, kolej bad ki skulbah bad ki dang bteng ruh ban pynlong ia ki jingkhynra ia ki nongdie drok bad kiba bun na kine ba shah kem ki dei kiba ju lap miet ban die drok bad ki dei ruh ki kynhun jong ki runar na ka jylla bad na kiwei ki jylla. Ula ong, ba ki pulit ki la pyndonkam ruh ia ki kor teknoloji bad na ka liang jong ka Special Branch bad ka CID ki la leh ia la ka bynta ban pyndonkam ia ki tei ki kor ki bor halor ki nongkhaii drok bad ki pulit ka jylla ki la iatreilang ruh bad ki pulit na kiwei ki jylla ban tehlakam ia ki kam sniew.