Ha Krem Pohlew, don ki kamra baheh ba lah ban pynlong jingialang

Ka Krem Pohlew Sharait ha Nongthymmai Kyndiar kaba jrong kumba 100 metre eiei, ka don ia ki kamra kum ka ing kiba heh shapoh kaba ngiam haduh kumba 30 ne 40 ngut eiei ki briew. Katkum ka jingiathuh u Rangbah shnong u bah Run Khonglanoh, ula iathuh ba hapoh kane ka krem ka don ka kamra kaba heh kaba la lah ban pynlong jingialang ruh. U la ong ba kane ka krem ka shim por kumba 20 minit eiei ban iaid na surok ban poi sha katei ka jaka bad ia kane ka krem la lap nyngkong da ki briew kiba wad lymbit mynshwa. 

“Ha kane ka krem Pohlew, ka jaka rung ka long kaba kham khim hynrei ynda la rung shapoh, ka heh bad ka don ki pung ruh ba kot sha khohsiew ka jingjylliew shwa ban poi sha ka kamra kaba heh, ka um ka khuid bha bad ki sher, ki shymprong, ki lymbit ruh ki bun,” ong u bah Run. U bah Run u la ong ba kane ka Krem ha ka por lyiur, ym lah ban rung shapoh namar ba heh ka um bad bun ki briew ki la ithuh ia kane ka krem hynrei tangba ba ym pat lah ban pynbha ia ka lynti iaid.

U rangbah shnong ula ong ba ka shnong kan pyrshang kumno ban pynlong ia ka kum ka jaka jngohkai khnang ban ai jingmyntoi ia ki nongshong shnong khamtam ba ka surok kala bha dang ha une u snem hi. “Ngi kyrmen ba kane ka krem kan long ka lad ia ki nonngshong shnong ban kamai ban shim bynta ban pynsaphrianng ia ka jingitynnad kane ka jaka. “, la ong bah Run.