U Bah PT Sawkmie, MLA barim u la pynpaw ba ka Mawlai Konstitwensi ka donkam ia ki MLA bad MDC ki bym dei na ka juh ka seng sain hima ne party, khnang ba kin lah ban kyntiew ia ki kam pynroi hapoh ka thain. Kaba mut u MLA na kawei ka party bad u MDC na kawei pat. U bah Sawkmie u la pynpaw ia kane ha ka sngi ba u la aiti ia ki tynghung pyrta shnong ne PA System kiba kynthup ia 8 tylli ki tynghung (horn) bad u mouth piece sha ka dorbar shnong Mawlai Umthlong hapoh ophis treikam jong ka ha ka 05 tarik u Risaw, 2024 ka sngi Saitjain. U la pynpaw ruh ia ka jingsngewkmen ba ki paidbah nong Mawlai ki dang kynmaw ieit ia u watla um long eiei shuh.
“Hadien ba ka dorbar shnong Mawlai Umthlong ka la wan iakynduh ia nga bad pynsngew halor ki jingdonkam ia ki PA System, nga ruh kum u nongmihkhmat barim ba don ia ka jingsngewkhia, ha i bor barit nga la lah ban pynioh ia kine ki tiar da ka jingkyrkhu jong U Blei,” ong u bah Sawkmie. Katba na ka liang u assistant rangbah shnong bah Lamphrang Mylliem Umlong u la pynpaw, ba nalor ki tynghung ba u bah Sawkmie u la ai, 70 percent na ki kam pynroi hapoh shnong Mawlai Umthlong ka dei ka Matti bah Process. Kumjuh ha kane ka sngi u Rangbah shnong bah Shaphrang Mylliem Umlong uba ieng ban kren na ka bynta ka dorbar shnong Mawlai Umthlong u la ai khublei bad pynpaw ia ka jingsngewnguh ia u bah PT Sawkmie uba la pynioh ia kine ki tiar pyrta shnong, kiba ki donkam bha, na ka bynta ban ai jingtip ia ki nongshong shnong halor ki jingdonkam ka shnong.
Ha kajuh ka por u la kubur ruh ia ka jingong u Assistant rangbah shnong ba 70 percent ki kam pynroi hapoh shnong ki dei ki matti u bah PT Sawkmie ha ka por ba i long nongmihkhmat. Ha kane ka jingialang balyngkot la ioh ruh ia ka jingkren na ka president seng longkmie Mawlai Umthlong ka kong P. Khongwar ha ka jingdon ryngkat ki dkhot seng longkmie, ki dkhot dorbar shnong bad kiwei kiwei.
