Ka District Hub for Empowerment of Women (DHEW), West Jaintia Hills kaba hap hapoh ka ophis jong ka District Social Welfare Officer, WJH, kum shi bynta ka Campaign ba shiphew sngi jong ka International Day of the Girl Child, Beti Bachao Beti Padhao, haka 10 tarik mynta u bnai ka St. Dominic Higher Secondary School, Mookyndeng, West Jaintia Hills District, kala pynlong iaka jingpynsngewthuh paidbah halor ka hok jong ki kynthei khynnah ba kynthup naduh ki jingbam batei, ka hok ban ioh jingiada bad ruh ki lad ai jingsumar. Ka Y. Kyndait, Gender Specialist, DHEW, haba kren lamphrang kala pynsngew iaki skhim bapher bapher hapoh ka Mission Shakti jong ka District Hub naka bynta ban pynkupbor iaki kynthei. Kala iathuh ruh iaki prokram kum ka One Stop Centre, Beti Bachao Beti Padhao (BBBP), Women Helpline (181), Pradhan Mantri Matru Vandana Yojana (PMMVY) bad ka Palna National Creche Scheme. Nangta ka la batai ia ka International Day of the Girl Child Day halor ka phang jong mynta u snem kaba ong “Girls Vision for future”. Kala kren ruh halor ka jingdonkam ban kyrshan iaki kynthei khynnah la haka pule puthi, ka koit ka khiah, ban ai mynsiem ia ki ha ki jingialehkai Sports, ka kam saiñ hima sima, ban ai jingiada ia ki, bad ha baroh ki bynta bapher.
Ka M.Niang, Lady Supervisor, ICDS Laskein Block kala kyntu iaki khynnah ban bam daki jingbam batei kum kiba la ai jingmut da ka ICDS sha ki Anganwadi Centre, namar dei kiba lah ban ioh bun ki nutrients bad vitamins, khnang ban lait naki jingshitom ba bunjait da kaba ioh iaka met ba koit ba khiah. Ka S.Lakiang, kum ka Ambassador jong ka Beti Bachao Beti Padhao ,DHEW WJH, kala ai mynsiem iaki khynnah lyngba ka jingiaid lynti bad jingshem jong ka haba iadei bad ka sports. Kala iathuh halor ka jingjop jong ka haka lympung WFF India 2023 Mr & Ms East India 2023 Zonal Body Building & fitness Champion kaba la long ha Ranchi Jharkhand bad ruh haka Mr and Mrs India 11th National Body Building & Fitness Champion 2023 kaba la long ha R,B.Dangayach Auditorium, Jaipur Rajasthan. Bad ong ruh ka jingdon bynta haka sports kam mut tang ban pynkhlaiñ iaka bor met, hynrei iaka bor pyrkhat pyrdaiñ kumjuh. Ha kajuh ka por ka jingnang bate iaka por bad trei shitom dei ka kaba kongsan ban long jop haka jingim
Ka M. Nongtdu kala kren halor ka jingshahktah ki khynnah haka district, bad kren ruh halor ka POCSO Act, ka Juvenile Justice Act. Bad bynrap ruh ia ka jingdonkam ban hikai iaki khynnah halor ka rukom ktah ba bha bad kaba sniew. Nangta ka iathuh iaki lad jingiarap naka bynta ki kynthei khynnah lyngba ka Child Helpline 1098. Ka E.Niang Health Educator na Laskein C.H.C kala pynshai halor ka jingdonkam ban peitngor iaka koit ka khiah ki khynnah kynthup ka Blood Pressure, Anaemia bad Cholesterol, khang ba kan ym wanrah ki jingshitom ba bunjait hadien habud. Bad ruh kala iathuh ba don ka Adolescence Friendly Clinic ha Laskein C.H.C ha kaba ki kynthei bala khie samla khnang ki lah ban leit mih khnang ba kin ioh jingiarap haba iadei bad ki jingeh ba ki mad.Ha kane ka sngi la don ruh ka open Quiz Competition, bad la ai khusnam ruh sha kiba jop. Iaka jingialang la pyniaid daka S. Meliora Lamare, Gender Specialist, DHEW bad iaki kyntien pdiang burom la ioh naka Sr. M.Nongseij jong ka St. Dominic Higher Secondary School, Mookyndeng.
