U Syiem ka Tripiura u Pradyot Deb Barman hynin ka nsgi Saitjain ula pynbna ba yn ai jaka na ka bynta ban tei ia u Mot Sahnam jong u Rev JJM Nichols Roy uba dei u Kpa jong ka Sixth Schedule bad yn seng ruh ia ka Tirot Sing Syiem Memorial School ha Tripura ha ka jaka kaba sah ki jaidbynriew Khasi. U Pradyot Deb Barman ula pyntip ia kane, haba iakren bad ki nongthoh khubor hadien ba la wai ka jingialang jong ki 10 tylli ki Autonomous District Council kaba la long ha Tripura Castle, Shillong.
“Ngi lah rai ba ngin tei ia u moh ban pynshanam ia u JJM Nichols Roy uba long u Kpa jongka Sixth Schedule ka riti synshar ka ri bad ngi dei ruh ban tei ia u mot sahnam jongu Pa Togan Sangma, Tirot Sing Syiem, Kiang Nangbah bad Upendra Brahma namar kim dei satia tang ki khlawait jong ki Khasi, Garo ne Bodo hynrei kidei ki briew kiba la iakhun na ka bynta ka ri bad ka kolshor ka jong ngi” ong u Syiem Tripura.
Ula ong ruh, ba ka District Council ha Tripura kan plie ruh ia ka skul ha North Tripura bad yn ai kyrteng da ka Tirot Sing Memorial School kaba dei ka jaka kaba sah da ki jaidbynriew Khasi. Katba u CEM ka KHADC u Bah Pyniaid Sing Syiem, ula iathuh ba u CEM ka Bodoland ula ai jaka sngewbha ia baroh ki District Council ka NE na ka bynta ban buh ia kino kino ki jingtei la kadei ka Guest House ne ophis treikam ha Bodoland.
