U Myntri Rangbah ka jylla u Conrad K Sangma bad u Symbud Myntri Rangbah ka jylla u Bah Prestone Tynsong, hynne ka sngi ula leit iakynduh ia u Myntri Kam Pohiing ka ri u Amit Shah ha Nongbah Delhi ban kyrpad ban pynkhlain ia ki bor pahara ha khappud bad ka ri Bangladesh ban tehlakam ba ki briew kiba nabar ri kim dei ban iohlad ban rungtuh shapoh ka ri India.
“Ngi la kyrpad ia u Myntri kam Pohiing ka ri, ba lada donkam, dei ban phah shuh shuh ia ki bor pahara ban pynkhlain ia ka jingpahara ha khappud bad u Myntri Kam Pohiing ka ri ula pynpaw ba yn sa shong bishar ia ka jinglong jingman bad ban shim ia ki sienjam kiba donkam” la iathuh u Conrad K Sangma
U Myntri Rangbah ula batai bniah ia u Myntri Kam Pohiing ba ki shipai BSF bad ki shipai bad ki pulit kila trei shitom bad kila peitngor bha ia ki jaka khappud kiba don ha ka jylla Meghalaya.
U Conrad ula ong “Ngi la pyntip, ba ngi la pynjari da ka korphiw miet ha shilynter ka khappud bad ka ri Bangladesh ban pynkhlain ia ka jingpahara bad ka jingshngain jong ki shnong kiba don ha khappud”.
“Ngi la banjur ia u Myntri Kam Pohiing ka Ri ba ngim dei ban ailad ia kino kino ki briew ba kin jam sha khappud ka ri India namar kadei ka kam iap kam im bad ngi la iakren sania bha ia kane ka mat” ong u Conrad bad ka bynrap ba ka sorkar India kala kren shai ba kan nym ailad ne shah ia kino kino ki briew ba kin wan jam na shiliang pud ban rung shapoh ri India.
Ha kawei pat ka liang, u Conrad Sangma bad u Bah Prestone Tynsong kila leit iakynduh ia ka Myntri Pla tyngka ka Ri ka N Sitharam bad kila pynpaw iaka jingsngewnguh halor ka jingmang ia ki surok ba thymmai hapoh ka Externally Aided Project (AEP) kaba kot T.2500 klur.
Kila kyrpad ruh ia ka Myntri Pla Tyngka ban iarap bad ban kyrshan lem ha ka jingthmu ka sorkar jylla ban seng ia ka jaka pdeng ka roi ka par ha New Shillong bad kiwei ki jaka.
