Ha u Jylliew yn sdang ai jinghikai ka MIT Meghalaya

Ka Maharashtra Institute Technology University (MIT) ha Meghalaya kan sdang ban ai jinghikai ba pura hapoh ka Campus lajong lane (Permanent Campus) ha u bnai Jylliew 2024 ha Mawkasiang.
Ia kane la pyntip da Dr Debmalya Bhattacharya u Pro Vice Chancellor jong ka MIT ha Meghalaya Campus.
Haba kren sha ki lad pathai khubor, u Dr Debmalya ula ong ba kane ka skul bah jong ki riewshimet la pynlong katkum ka ain kaba la pdiang da ka ïing dorbar jong ka Meghalaya ha snem 2011 bad ha u snem 2017 la pynkylla noh ia ka kyrteng sha ka Maharashtra Institute Technology University da ka ïing dorbar thawain ka jylla.

U Dr Debmalya ula iathuh ba ha u snem 2021 ka skulbah kala ioh ban thied 5 akar ka jaka ha Mawksiang ha ka kyrteng jong ka MIT Meghalaya lyngba ka jingiarap ka Sorkar Jylla, ki bor shnong bad ka tnat khyndew kiba la kwah ban kyrshan ia ka skulbah ban ioh ia ka jaka ban tei iaki jingdonkam jong ka skulbah. “Ka Skulbah kala pynlut palat T.100 klur ban tei ia iaki jingdonkam bad kane ka dei ka bynta kaba nyngkong bad ha ka bynta kaba ar yn sa shna ia ki jaka sah jong ki samla pule jong ka skul bad ka bynta kaba lai yn dang pynheh shuh shuh ia ki jaka pule” la ong u Dr Debmalya.

U Dr Denmalya ula pynpaw ba ka MIT Meghalaya ka sngewthuh ba lada kam don laka jong ka jaka pule ba pura kin nym lah ban ioh ia ka jingshaniah na ki paidbah hynrei mynta kila ioh ia ka jaka ai jinghikai kaba pura ki paidbah kim dei ban don ka jingartatien ia kane ka skulbah wat la ka dei kaba la pyniaid da ki riew shimet.

Ula iathuh ba ha kine ki snem kiba la dep, iaka jingpule la pynlong Pohktieh ha kawei ka ïingwai bad ki don tang kawei ka tnad pule hynrei hadien ka jingplie iala ka jong ka Campus ha Mawkasiang, ka MIT Meghalaya kan sa sdang noh sa 5 tylli ki wei pat ki tnat pule. Nalor kane ula ai nuksa ba ia ka jingpule ha ka Degree kan long saw snem, kata lai snem ban pyndep ia ka degree bad shisnem yn hikai ia ki samla ba kin pynkhreh ia ka eksamin UPSC bad MPSC ba kin lah ban pass ia ki eksamin ban ioh kam sorkar.