Ka jingpyndep iaka jingmaramot bad shna pynbha iaka jingkieng Dam Umiam kan nang kham slem namar ka IIT Guwahati kala ai jingmut ban tah daka Dewbilat ym daka rong surok halor ka jingkieng. Namar kane, ka jingpyndep maramot ia kane jingkieng Dam Umiam yn lah ban pyndep haka taiew khatduh u bnai Naitung ne haka taiew ba nyngkong u Nailar 2024.
Haba pyntip ia kane, u Myntri ka tnat Bording u AT Mondal ula ong ba ka tnat ka iatreilang bad ka IIT Guwahati ban wad bniah iaka rukom maramot iaka jingkieng Dam namar kane, donkam ban sngap iaka jingai jingmut ka IIT. “Namar baka IIT Guwahati kala ai jingmut ban tah daka Cement ym daka rong halor ka jingkieng Dam Umiam, ka jingpyndep iaka jingmaramot ban shna pynbha ia kane ka jingkieng ruh yn pyndep haka taiew khatduh u bnai Naitung ne haka taiew ba nyngkong u Nailar 2024” la ong u Mondal.
U Mondal ula iathuh ba ki kam ki iaid beit iaid ryntih bad katkum bala pynbeit bad ka tnat ka iatreilang bad ka IIT namar kane ka jingmaramot kan nang pynneh iaka jingkieng sa palat 20 snem hadien bala pyndep iaka jingmaramot. “Haka taiew bala dep nga la wan jurip iaka jingkieng Dam Umiam bad naka liang ka IIT Guwahati kala ai jingmut ban tah daka Dewbilat ym daka Rong surok nalor ka jingkieng namar kata ka tnat ruh ka hap shim iaka jingai jingmut ka IIT Guwahti ban pynskhem shuh shuh ia kane ka jingkieng” ula ong.
