U Myntri Rangbah ka Jylla u Conrad K Sangma hynne ka sngi ula pyntip ba ka jingiakren pynbeit ha ka wat baar (Phase II) bad ka Jylla Assam kan sdang ha u bnai Risaw. Haba kren sha ki lad pathai khubor u Conrad ula pyntip da dang shen ula kynduh ia u Myntri Rangbah ka Jylla Assam u Himanta Biswa Sarma bad la mynjur ban bteng biang ia ka jingkren pynbeit pud hapdeng ka Meghalaya bad Assam.
Kum ban pynkynmaw kine ar tylli ki Jylla ki la iasoi da ka Memorandom of Understanding (MoU) na bynta ban pynbeit pud ha ki 6 tylli ki jaka ia kajia pud.“Nga la iakren bad u Myntri Rangbah ka Assam ha ka jingiakynduh lai taiew mynshwa bad ngi la rai lang bad ngi khmih lynti kaba kloi eh lehse ha u bnai Risaw, ngi dei ban pynlong biang ia ka jingiakynduh ban iakren ia kane ka kam” la ong u Conrad.
U la bynrap ba ka wat ba ar (Second Phase) ka dei kaba kham jwat ban ia pynbeit namar ki jaka kum ha thain Langpih, Psiar, Khanduli, Block-I bad Block II kim dei kiba suk ban iakren. Lah ban kdew ba ki 6 tylli ki jaka kajia pud ki bym pat pynbeit haduh mynta ki kynthup ia ka Langpih, Borduar, Nongwah-Mawtamur, Desh doomreah, Block-I & Block-II, bad Khanduli-Psiar.
