Ka Shillong Press Club ka la pynlong ia ka ilekshon ban jied ia ki nongkitkam thymmai mynta ka sngi hadien 14 snem, ha kaba u Bah Deimaia Siangshai ula shah jied kum u President ba thymmai ka Shillong Press Club.U Bah Deimaia u dei u Editor jong ka kot khubor Khasi ‘Mawphor’ ula jop kum u President da kaba ioh 91 Vote katba u Bah Joe Thangkhiew na ka Batesi TV ba wan ba-ar u ioh 67 vote bad u Bah Raphael Warjri na Media plus ba wan balai ula ioh tang 6 Vote.
Katba ha ka kam Treasurer ka jingiakhun ka long hapdeng ki ar ngut, u Bah Gershom Hat ba dei u Editor jong ka kot khubor Khasi ‘U Peitngor’ u la jop da kaba ioh 113 Vote pyrshah ia u bah Martin Nongkhlaw na ka Batesi uba la ioh 50 vote.Ha kane ka sngi, ki don 164 ngut ki nongthoh khubor ba la wan ban shim bynta na kylleng ki district ka jylla ban thep vote, ki la pynpaw ka jingkmen ban ioh jied ki nongkitkam bathymmai da ka jingangnud ban wanrah ia ka kylla ha ka kynhun.
Ia kane ka ilekshon la pyniaid da ka tnat Directorate of Information and Public Relations (DIPR) ka Sorkar Jylla hynne ka sngi 5 tarik Naitung, 2024 ha ka shlem treikam jong ka Shillong Press Club ha Lachumiere Shillong. Kum ban pynpaw ia ka kam General Secretary, u Bah Dominic Savio Diengdoh na ka T7 ula jop suk khlem don ba iakhun pyrshah.
