Ka long shisha sa shisien pat ka sngi kaban sah jingkynmaw ha ka histori treikam jong kawei ka seng kaba la bna nam bha hapoh ka jylla Meghalaya hi baroh kawei kaba la tip kum ka Ri Bhoi Youth Federation (RBYF), ha kaba ha ka jingiaid lynti kaba kot 45 snem kynthih ban shakri ia ki paid ka bri u Hynniewtrep bad ka jaidbynriew, mynta ka 7 tarik u Jylliew 2024 kane ka seng ka la ioh ban plie pyrda noh ia la ka shlem treikam kaba skhem ban nang pyniar ia u jylli ka jingshakri ia kaba la plie da u Founding Member bad u Chief Adviser ka sorkar jylla u Dr. D.D Lapang kum u kongsan.
Ia kane ka shlem treikam kaba thymmai bad kaban long ruh kum ka jaka ia mir jingmut ban pyntyllun ia ki kam shakri ia ka ri bad ka jaidbynriew la tei ha ka shnong Saiden harud u surok bah National Highway-06, ha ka jaka ba la ai sngewbha ruh da ka Dorbar Shnong Saiden, Ri Bhoi District.
La wan ban ai mynsiem ha kane ka sngi khraw jong ka kynhun sengbhalang ka RBYF, da ki MLA ka Ri Bhoi District, Bah Sosthenes Sohtun, na Jirang ba dei ruh u President barim ka RBYF Byrnihat Circle, nangta u bah Mayral Born Syiem na Nongpoh, Dr. Celestine Lyngdoh na Umsning, Bah Charles Marngar na Mawhati, ki nongialam barim ka RBYF ba kynthup naduh u Bah Doris Sulein, Bah FM Mawphniang, Bah CL Masharing, u Bah EK Lapang, Rangbah Shnong ka Shnong Saiden nalor kiwei kiwei ki riew pawkhmat ka them Ri Bhoi District.
Ban pynskhem ia ka kyntien ‘Ka Jingiatylli ka long ka Bor’, ia kane la pyni nuksa da ka jingiadonlang ruh kiwei kiwei ki nongialam sengbhalang kiba kynthup naduh u Bah Lambok Star Marngar, president ka KSU, Sengkmie, u Bah Sadon Blah President ka HNYF Sengkmie, u Bah Dundee Clif Khongsit, President ka FKJGP, Sengkmie, u Bah G. Shylla, President JSU, Sengkmie, ki nongialam ka KSU, FKJGP na Ri Bhoi District ba kynthup ia u Bah Ferdynald K Kharkamni, Bah Lui Star Lyngdoh, Bah Lumlang Mawnai nalor kiwei kiwei ki nongialam pawkhmat na kane ka district.
La pdiang sngewbha ia baroh kiba la wan ia shimbynta ha kane ka sngi khraw jong ka RBYF, da u Bah Bipul Thangkhiew, president rangbah bad la pule ia ka histori naduh ba la seng ia ka RBYF haduh ka histori treikam jong kane ka seng da u Bah Bulletstar Marbaniang, General Secretary.
Katkum ka khana lyngkot naduh ba la seng ia ka RBYF, la suit la shor ia ka RBYF hadien ka jingia don bynta lang bad ka Ri Bhoi Dorbar kaba don bynta ha ka District Demand Committee ha kaba la shim ia ka rai ban pynrung bad don bynta lang ia ki samla ha kane ka komiti da kaba tip ia ka kum ka Ri Bhoi Dorbar Youth Wing ha ka 6 tarik Nailur 1979 bad ha ka jingiaiaid lynti kata 25 tarik Nailur 1979 la rai pat ban suit ban shor ia kane ka Youth Wing sha ka Ri Bhoi Youth Federation bad naduh kitei ki snem na kane ka seng la pynmih ki nongialam kiba radbah kiba la iai shakri ia ka bri u Hynniewtrep haduh u ne u snem bad ban nang iai bteng ia kane ka jingshakri.
Haba kren ha kane ka sngi kum u kongsan bad uba dei ruh uwei na u nongdon bynta ha kaba seng ia kane ka RBYF, u Dr. D.D Lapang u la pynpaw ia ka mynsiem jong ka jingkmen ba ka RBYF ka la lah ban tei la ka jong ka ophis treikam bad kane ka paw ba ki nongialam ki don ia kata ka jingkitkhlieh kumno ban shakri ia ki paidbah ban ia pyrkhat pyrdain lyngba kane ka ophis ia kino kino ki jingdonkam ki paidbah hapoh ka Ri Bhoi District.
Kum u nongdon bynta ha kaba seng ia ka seng RBYF, u Dr. D.D Lapang u la ai ruh ka jingkyrkhu kyrdoh ia ki nongialam ka RBYF ba kin dang bteng ia ka jingshakri na ka bynta ka bha ka miat jong ki paidbah ha Ri Bhoi bad u khmih lynti ruh ba ka RBYF kan dang lah ban leh shibun ki kam kiba kraw kiba ai jingmyntoi na ka bynta ka Ri Bhoi bad ka jylla hi baroh kawei.
Shuh shuh, u la kyntu ruh ia ki nongialam ka RBYF ba kim dei ban shongthaid ban shakri ia ki paidbah ka dong Ri Bhoi bad kumba ki la don la ka jong ka ophis treikam ki dei ban dang pynkhlain shuh shuh ia ka jingtreikam khnang ba kin lah ban kit ia ka khiah ka shon ki paidbah bad ruh ban leh shibun ki kam kiba kyntiew ia ki paidbah ha ka District bad ka jylla hi baroh kawei, u la bynrap.
