Hadien 50 snem pynkhie im biang ka Seng Khasi Nongwar ïa ka Shad Suk Mynsiem

Ha ka 17 tarik U Lber 2024, 10 haduh 12 tylli ki tnum iing jong ka  Seng Khasi Nongwar ki la mih shakhmat ban  ïoh ban pynkhie im biang ïa ka Shad Suk Mynsiem hadien 50 snem. Kum ka shnong kaba u Lei Ryngkew U Lei Basa uba dang ri dang kdup dang sumar ia kane ka shnong, ka jingmih ki 10-12 tylli ki tnum iing Seng Khasi ban pynlong ia kane ka shad ainguh ai dem, lah ban ong ba ka dei ka kam shlur kaba da radbah bad kaba ai mynsiem lem ia kiwei pat ki tnat Seng Khasi.

Ha kane ka jingpynkhie im biang ia ka Shad Suk Mynsiem, la wan ïashim bynta ki rangkynsai bad ki thei sotti na kylleng ka Bri Hynñiewtrep. U Riew Tymmen Riew San ka Seng Khasi Kmie u la ai ka duwai ka phirat ka nguh ka dem ha ka Ïing Seng ha ka por mysntep bad kum ka dak ba la wai ka shad la pynhiar Ïa ka lama Seng da u President ka Seng Khasi Kmie, Rgh O. Pyngrope. Shuwa kata la ïoh ruh ka jingkren ai khublei bad ai mynsiem na iwei na ki trai shnong iba la shim ka jingkitkhlieh bad kitkhia ban pynlong biang ïa kane ka Shad, I Kong Mira Dkhar.

Ïa kane ka shad la ïoh ban pynlong lyngba ka jingïatreilang hapdeng ki dkhot ka Seng Khasi Nongwar, Seng Khasi Sohra Circle,  Seng Khasi Kmie, Seng Khasi Mawlai, Seng Khasi Nongthymmai bad kiwei kiwei. Ïa ka shad la wan sakhi lem u Wahadar ka Shella Confederacy, U Swami Maharaj ka Ramkrishna Mission Sohra bad ki President ki Secretary, ki Rangbah bad ki longkmie na tnat Seng Khasi najan bad jngai.