Ka khubor kaba kmen bad kaba la ap tmang mynta da ki phew snem na bynta ka shlem ai jingstad ka Raitong Government Lower Primary School ka la urlong hadien ba u Myntri ka tnad Pule Puthi u Rakkam A Sangma u la kular ban pynioh noh da ka iing building kaba thymmai ia kane ka shlem ai jingstad kaba la seng naduh u snem 1949 ha ka shnong Raitong, Ri Bhoi District. Ka Raitong Government LP School, da ka jingkmen bad ka jingsngewsarong ka la ioh ban rakhe pyndon burom ia ka jingjam pat sha u wei u mawmer ha ka jingkynjoh sha u mawmer ba 75 snem naduh ba la seng ia ka ha u snem 1949 kum ka jingiaid lynti ban pynphriang ia ka jingnang jingstad ban ban pynphyrnai ia ka lawei wat hapdeng shibun ki jingtynjuh bad ki diengpynkiang ki bor pyniaid skul da ka jingskhem mynsiem ki la iai trei shitrhem ban pynphyrnai ia ka lawei jong ki samla pule jong ka thaiñ Raitong. Ha ka jingkren jong u Myntri ka tnad Pule Puthi, u Rakkam A Sangma, nalor ba u la ai jingiaroh ia baroh ki bor pyniaid jong ka Raitong Government LP School, kiba la treishitom ban ai jingnang jingstad sha ki samla pule bad ban nang iai bteng ia ka jingshakri ban kyntiew ia ka pule puthi,
Lyngba kane ka sngi, u Rakkam u pynpaw ruh, ba ka tnad Pule Puthi ka jylla, kan sa pynioh skul building ba paka sa ia ki 6 tylli ki shlem ai jingstad kiba don hapoh ka Mawhati Konstituensi bad ba ka sorkar jylla kan sa nang pynbha ia ki iingskul bapher bapher hapoh ka jylla Meghalaya. “Watla kum ki nongpyniaid skul ki la mad jingeh ha ka jingiaid lynti ban phriang jingnang jingstad ha kane ka thaiñ hynrei da kaba kynmaw ba ka jingnang jingstad ka long kaba kordor ia man u wei pa u wei u ne ka khynnah pule, kumta kane ka skul ka la nang jam shaphrang ban kyntiew ia ka pule ka puthi”, ai jingiaroh u Rakkam A Sangma. U la kyntu ruh, ia ki kmie ki kpa lem bad ki nonghikai ban iatreilang ban kyntiew ia ka jingnang jingstad ha kine ki Shnong bad ba ki samla pule ki dei ban pynmlien ban kren ia ki jaid ktien bapher bapher ban pynsuk ia ki haba ki leit ban bteng ia ki jingpule ne trei shabar ka jylla ne ka ri, da kaba kdew ruh, ba dang shen ka sorkar jylla ka la dep ban phah 25 ngut ki Nurse ban leit trei sha Japan ban kyntiew ia ka lad iohkam iohjam.
La ia donlang ruh ha kane ka sngi, rakhe ia ka lyngkhuh snem ba 75 ka Raitong Government LP School, da u Bah Charles Marngar, MLA/MDC ka Mawhati Konstituensi, ka Additional deputy commissioner ka Ri Bhoi, ka Kong Brenda L. Pakyntein, ki ophisar na ka tnad pule puthi ka Ri Bhoi, ki Rangbah shnong, ki kmie ki kpa, ki nonghikai bad ki khynnah skul. U Bah Charles Marngar, ha ka jingkren jong u, u la ai khublei kyrpang ia ki bor pyniaid skul bad ki khynnah pule ka Raitong Government LP School ha kane ka sngi kaba sah jingkynmaw badnruh ban iaroh ia ka jinglen lade jong ki nonghikai, ki bor ka managing committee bad kiwei kiwei kiba la don bynta ha ka jingkiew jong kane ka shlem ai jingstad. U la ong ruh, ba kum u nongmihkhmat u don ia ka thong ban kyntiew ia ka pule ka puthi hapoh ka Mawhati Konstituensi nalor ki kam pynroi bapher bapher kumta u la khot la wer ia baroh ki nongshong shnong ban ai ka jingiatreilang ban kynjoh sha kane ka thong, da kaba ong ba marwei ban iakhun kam long kaba suk hynrei dei ka jingiatreilang hi kaban pynjop ia ki jingangnud baroh. Ha kane ka jingrakhe ia ka lyngkhuh snem ba 75 snem, la ioh ban plie ruh ia u maw sahnam ka jingdap 75 snem lem bad ka souvenir bad ruh ka jingpynphuh pynphieng bad pynshong kun ruh da ki jingrwai jingshad bad ki jingialehkai bapher bapher ba la ia shimbynta da ki khynnah skul ka Raitong Government LP School.
