Ka jingpyntrei iaka surok na MES ban pyniasoh iaka surokbah sha Demseiniong kala iaid shaid shaid ban shen yn sa lah ban pyndep noh ha kine ki bnai ban wan. La iohi ruh ba watla ym pat sdang iaka jingsiang rong, hynrei ki kali kila sdang iaid na kane ak surok. Lah ban kdew ba haki snem bala dep, kane ka surok na Garoline Laitumkhrah ka ba iaid lyngba ka MES Road ter ter shaduh Demseiniong ka hap haka jingkhmih jong ki shipai hynrei dang ha une u snem 2024, ia kane surok la aiti noh shaka tnat Public Work Department (PWD) Road Shillong Central Division.
Hashuwa ban aiti shaka tnat PWD, kane ka surok ka long kaba khim bad kaba sinew kaba la wanrah ka jingeh iaki paidbah ban iaid lyngba kane ka surok. Ha u bnai Lber 2024, naka liang u Myntri Sorkar u Bah AL Hek u la iakren bad u Brigadier ka MES u badei ruh chief engineer MES Shillong Zone bad la pynthikna ba ia kane ka surok la dep ban aiti shaka tnat PWD Shillong Central Zone. Haba iadei bad ka jingsdang pyntrei ia kane ka surok, u Bah Hek u la pyntip ba ki kam kila iaid shaid shaid bad mar synkut ka aiom slap, yn sa lah ban siang rong.
“Iaka ba mynta ki kam kila iaid shaid shaid, ka surok kala kham heh bad la shna ruh iaki nala khnang ban tuid um haka por slap” la ong u Bah Hek.U Bah Hek u la iathuh ruh ba kin don ruh ki jaka iaid kjat naka surok MES Road ter ter shaduh Demseiniong khnang ban pynsuk iaki paidbah kiba iaid kjat ban poi sha Demseioniong ne Nongmensong.
