Hadien ka jingshah khang ki kali Assam ha kawei ka kynhun Sengbhalang na jylla Meghalaya ha Umtyngar ban rung sha ki bynta dawki bad sohra kaba la jia haka 26 tarik, Naitung 2024. Mynta ka sngi ka 30 tarik, Naitung ka synjuk jong ki nongniah kali jong ka jylla Meghalaya bad Assam ki la pynlong ia ka jingialang ha Green Hill Dhaba, Nongpoh ban ia kren sngewthuh jingmut bad ban ai ruh ïaka jingpynshai sha ki paidbah halor katei ka jingjia.Ha katei ka jingïalang la wan ban iashim bynta lang da ki nongialam jong palat 11 tylli ki seng jong ki nongniah kali kamai na ka jylla Assam bad Meghalaya.
Haba kren sha ki lad pathai khubor hadien katei ka Jingïalang, na ka liang u Bah Tiplang Nongbet, President ka Hynniewtrep Tourist Taxi Association (HTTA) bad u Robin Dutta, President ka Greater Guwahati Tourist Taxi Association (GGTTA) ki la pynpaw ba ka jingialang mynta ka sngi ka long ban pynshai sha ki paidbah nongleit nongwan ba kam don satia kano ka jingpynmih hukum jong ka sorkar Meghalaya ban khang ia ki kali kamai na Assam ban rung sha ka jylla Meghalaya, hynrei kadei tang ka jingleh jong ki katto katne ki ‘riew shimkabu.
Shuh shuh ki la ïathuh ba la ïoh ruh ban ïa kren halor Kawei pat ka mat, kata ka long halor ka jingnang mih bun jong ki kali shimet ban kamai beaiñ khlem siew ïaka bai khajna. Halor kane ka bynta kitei ki kynhun jong ki nongniah kali na baroh artylli ki jylla, ki la rai ban ïa trei ryngkat ban nym ailad ïa kitei ki briew shim kabu kiba pyndonkam daki kali shimet ban kamai khlem da siew ïaka bai khajna naba kane ka jingshim kabu Jong kitei ki briew ka la ktah bha ia ka kamai kajih jong ki nongniah kali na ki ar tylli ki jylla kiba hap ban siew bun ia ka khajna katkum ba la pynbeit.
Nalor kitei ki arngut ki nongïalam, La ïoh ruh ïaka jingkren naka liang u Bah Victor Malsawma Duia, uwei na ki nongniah kali kamai na Shillong sha Kad Liengsuin Guwahati, hakaba naka liang jong u, u la iathuh ba ha kane ka jing ïa kynduh jong ki nongñiah kali na artylli ki jylla la ïoh ruh ban iakren halor ka jingeh jong ki nongniah kali kamai ka jylla meghalaya halor ka jingshah khrong pisa hapoh katei ka Kad Liengsuin da ki ‘Agent’ kaba la buh jingeh shikatdei ia ki bad ktah ruh ïaka kamai kajih. Na ka liang u bah Victor Malsawma Duia u la pyntip ruh ba naka liang ki nongñiah kali kamai jong ka jylla Assam ki la kular ban ïa kren ban pynbeit lang halor kane ka jingeh kaba ki nongñiah kali na jylla meghalaya ki ju mat hapoh ka jaka pynïeng kali ha kad Liengsuiñ.
