Ka Seng Hynniewtrep Youth Council (HYC), West Khasi Hills hadien ki jingleit khynra ïa ki ktem dih bad khaïi drok hapoh sor Nongstoiñ, ka Seng mynta ka sngi kala leit ban ïakynduh ïa u DC bad SP ka West Khasi Hills ban ïakren bad ïatai halor ka jingjyllei u drok bad kiwei pat ki kam sniew bad kam awria hapoh ka thaiñ Nongstoiñ bad WKHD hi baroh kawei.
Haba ïakren sha ki lad pathai khubor hadien ka jingïakynduh ïa u DC bad SP, u President ka Seng HYC, WKHD u Samla Lumlamg Kharsyiemlieh u la ong ba na ka liang jong ka Seng kala ïoh ban ïatai sani bha halor kitei ki kam ha khmat u DC bad SP bad ka jingïalang kala neh kumba 1 kynta eiei ban ïakren halor kumno ban thawlad ban rat diengkhong ïa u drok bad ïa ki kam sniew hapoh sor Nongstoiñ.
Shuh shuh u la ong ruh ba ka Seng kala buh ruh ka jingdawa na u DC ba u dei ban ïakren bad u Syiem ka Hima Nongstoiñ halor ka jingjyllei ki kam sniew hapoh ka ïew Nongstoiñ bad ban phah pynpaw noh ruh ïa ki ïing ne dukan bala shu ïeh jah namar ka kylla long pynban ka ktem kam sniew, nalor kata ka Seng ka kyntu ruh ïa u DC ba un thawlad lem halor kumno ban ïoh ïarap na ka bynta ban buh ne plei noh ïa ka rehab center hapoh Nongstoiñ.
Ha kawei pat ka liang ka Seng kala Dawa ruh na u SP ka WKHD ba un pynkhlaiñ ia ki pulit ka Anti Narcotic Task Force (ANTF) na ka bynta ban pynduh jait ïa ka jingjyllei u drok hapoh ka District bad ruh ban phah pahara da ki pulit hapoh ka ïew Nongstoiñ khnang ba kan wanrah jingshngaiñ ïa ka ïaid ka ïeng ki paidbah ba kumjuh ïa ki nongshong ïew.
