Hap iaid kjat bad shong lieng ki nongtrrei ilekshon ha ki 60 Polling Station

U Chief Electoral Officer (CEO) ka Jylla u BDR Tiwari ula pyntip ba ki don kumba 60 tylli ki jaka thep Vote (Polling Station) ha kaba ki nongtrei ka tnat Election ki donkam ban iaid ia ki riat, ki hap jam sha shilliang wah da ki lieng. Haba pyntip ia kane u CEO ula ong, namar ka jinglong jingman ka mariang ha Meghalaya ki don bun ki shnong ha Jylla ba hap iaid sha ki riat lane sha shilliang wah.

U CEO ula ai nuksa ia ka shnong Nongriat, hapoh East Khasi Hills kaba pawnam namar ka jingdon ki jingkieng jri bad ula iathuh ba ki nongtrei ka tnat Election ki donkam ban noh ia ki riat ban poi sha kane ka shnong ban ai lad ia ki paidbah ban thep Vote. “Nalor ka Nongriat ha East Khasi Hills, ki don shuh shuh ki shnong hapoh ka thain South Garo Hills bad East Garo Hills ha kaba ki nongtrei ka tnat Election ki hap ban noh sha ki riat bad jam sha shilliang wah da ki lieng” la ong u CEO.

U CEO ula pyntip ha kum kine ki jaka thep Vote lane Polling Station, ki nongtrei ka tnat Election kin mih noh naduh ka 17 tarik mynta u bnai ban poi sha kine ki jaka. Nalor kane u CEO ula pyntip ba ki la don haduh 4,500 ngut tam ki briew kiba la pyndep ia ka jingthep Vote (Home Polling) na la iing. Lah ban kdew ba ka jingthep Vote na la iing hapoh Meghalaya ka la kut noh ha ka 13 tarik mynta u bnai na ka bynta kiba la noh ka rta (Kiba palat 85 snem) bad ia kiba duna dkhot met.