Ka Meghalaya Board of School Education (MBoSE) ka la pynkhreh ban pynlong 2 tylli ki eksam ha ka Secondary School Leaving Certificate Examination (SSLC) ha ka shisnem naduh u snem 2025. Ia kane la pyntip da u Myntri ka tnat Pule Puthi u Rakkam A Sangma ba ka kynhun Myntri ha ka jingialang hynne ka sngi ka la mynjur pynkylla ia ka Meghalaya Board of School Education Regulation for Secondary School Leaving Certificate Examination, 2011 kata katkum ka National Education Policy (NEP).Kane ka long ban ai lad ia ki samla pule SSLC kiba shah bat (Fail) ba kin ioh iakhun biang ia ka eksam tang hapoh ka shibnai-ar bnai hadien ba ki shah bat.
“Ka MBoSE kan pynlong noh 2 tylli ha ka shisnem naduh u snem 2024 shakhmat” la ong u Rakkam A Sangma. Ula pyntip ia ka eksam banyngong yn pynlong ha u bnai Rymphang ne Lber bad ka eksam kaba ar kan long na ka bynta kito ki shah bat ha baroh ki sobjek lane kawei lane ar-lai tylli ki sobjek. ‘Yn shah ban iakhun ia ka Exam hapoh ka shibnai-ar bnai eiei kata mut hapoh u bnai Jymmang” ula ong.
U Myntri ka tnat Pule Puthi ula ong, ba kane ka rai la shim ban kyrshan ia ki samla pule namar ka supplementary exam ki dei kiba ju pynlong hadien ka shisnem hapoh ka Jylla. Nalor kane u Myntri ka tnat Pule Puthi ula pyntip ba kan ym don shuh ruh ka Optional Paper lane ‘Best of Five’ naduh u snem u 2026-2027. “Naduh u snem 2026-2037, baroh ki samla pule kin ap ban Pass ia baroh hynriew tylli ki sobjek ha ka eksam” ula ong.
