Ha ka synshar paidbah, baroh ki don ka hok ban iakhih katkum ka Article 19 jong ka Riti Synshar ka Ri India, hynrei kane kam mut pat ba ka jingiakhih kan ktah ia ka iaid ka ieng ki paidbah. Hynne ka sngi ka jingiakhih, ki dkhot ka Joint Action Committee (JAC) jong ki 3 tylli ki Polling Station ka la pyndkoh ia ka iaid ka ieng ki paidbah ha nongbah Shillong bad khamtam ka thaiñ Lumdiengjri Garikhana. La iathuh naduh ka por 10 mynstep ki dkhot ka JAC ki la shong hapdeng ka surokbah pyrshah ka khyrdop jong ka KHADC kaba dei ruh ka National High (NH-06) kaba la wanrah ka jingdheng kali ba jur namar ka dei ka surokbah ka sor Shillong. Ka jingsahkut kali ka dei namar ki paidbah ki shong hapdeng surok ban khang ia ka jingiaid ki kali ban rung shapoh phyllaw jong ka KHADC kaba la la ktah ia baroh ki paidbah. La iohi ba ki nongleit nongwan ki hap ban iania bad ki nongiakhih tang ban lait ki ar shaka. Ki katto katne ki Longkpa kiba wan shaw School iala ki khun ki hap ban ia pyni nia bad ki nongiakhih ban ioh iaid na kane ka surok, katba kiwei pat ki hap ap palat 3 kynta. La sakhi ruh ba wat ki kali kit nongpang (Ambulance) ki la shem jingeh ban ioh iaid na kane ka surok bad dei tad hadien ka jingwan tuklar ki Pulit, ki katto katne ki arshaka bad ki Ambulance kila ioh ban iaid.
Halor kane ka jingiakhih ka JAC, u Deputy CEM ka KHADC u Bah PN Syiem u la pyntip ba ka Executive Committee (EC) jong ka District Council kan shong jingialang halor ka jingpyrshah ka Joint Action Committee (JAC) ia ka jingpynbeit pud thymmai ia ki constituency jong ka Council. Haba kren shaki lad pathai khubor u Bah PN Syiem u la ong ha ka jingshisha ka iingdorbar jong ka KHADC ka la mynjur ia ka jingpynbeit pud thymmai hynrei kumba paw mynta ki paidbah nongshong shnong ki pyrshah juh ban rah ia ki 21 tylli ki shnong na Mawshynrut sha Rambrai-Jyrngam Constituency. U Bah PN Syiem u la iathuh ba kine 21 tylli ki shnong ki hap hapoh 3 tylli ki Polling Station ka Mawshynrut kata ka Misei, Mawsmai bad Langdongdai bad kine ki shnong ki hap hapoh ka Rambrai-Jyrngam constituency haka ilekshon MLA.”Ka jingmut jong ngi ha ka por leh Delimitation ka long ban pynsuk ia ki jingdonkam baroh kan bha eh ban pynhap hajuh kata ilekshon MLA bad MDC namar kine 3 tylli ki Polling Station ki hap hapoh ka Rambrai-Jyrngam constituency haka ilekshon MLA” la ong u Bah PN Syiem.
U Bah PN Syiem u la iathuh baka EC kan shong jingialang bad ia ka jingmynjur jong ka EC yn rah hapoh ka iingdorbar ka ban long haka 19 tarik Nohprah 2024 ban wanrah biang iaka jingkylla Amendment. “Ka jingthmu ka long ba ka don ka jingai jingmut ba namar ba kine ki lai polling station ki hap hapoh ka Rambrai MLA constituency, balei ba ym rah lang noh ia ki hapoh ka Rambrai MDC constituency. Hynrei, kiba bun ki sngewtynnad ia kane ka rai. Kumta, ngi la kren shai sha ki ba ka EC kan sa shong bishar bad khmih biang ia kane ka kam bad kan sa wan ia ki jingpynkylla ha ka Dorbar Tlang ban wan” ula bynrap.
