Hapoh ka jingialam Modi ka Assam ka la ioh jingithuh ia ka ktien Bodo

U Myntri Sorkar Pdeng ba dei khmih ia ki tnat Kam Pohiing bad Cooperation, u Amit Shah u la ai jingkren ha ka bynta kaba 13 jong ka Triennial Bathou Mahasabha Conference ha Tezpur, Assam.
Ha ka jingai jingkren jong u, u Shah u la ong ba ka India ka dei ka ri kaba bun ki jingngeit bad ba ka jingngeit Bathou ka la kiew shaphrang ha ryngkat ka Sanatan Dharma bad ba ka dei ka bynta kaba kongsan bha jong ka India. U la ong ba namar ka rukom pyrkhat kaba pher bad ki sienjam jong u Myntri Rangbah Duh, Narendra Modi, ia ka jingeh Bodoland jong ka thain shatei lammihngi la pynbeit bad mynta kane ka thain ka la ieh noh ia ka jingiaumsnam bad ka la iaid shaphrang ha ka lynti jong ka roi ka par . U la ong ba la seng ia ka Dularai Bathou Gouthum ha Guwahati ha u snem 1962 bad naduh katei ka por, ka trei ban pyni ia ka jaitbynriew Bodo bad ka jingngeit Bathou. U Shah u la ong ba kane ka Mahasabha ka la trei ban pyni ia ka jingngeit Bathou ha ka rukom im jong ki jaitbynriew Bodo da ka jingshemphang bad ka jingstad science. U la ong ba ka Sorkar Assam ka la pynbna ba ka sngi Ba ar jong u bnai Magh ka dei ka sngi shuti na ka bynta ka Bathou Puja.
U Myntri ka tnat Kam Pohiing u la ong ba u duwai na ka bynta ka shongsuk shongsain jong baroh kawei ka pyrthei khamtam ka thain shatei lammihngi lyngba ki jinghikai Bathou Mahasabha lane ka Dharma, ka jingkiar ia ka jingiaumsnam, ka jingiasuk, ka jingmap bad ka jingsngewlem ia kiwei. U la ong ba ki dei tang kito kiba sngewthuh ia ka jingmut jong ka jingngeit Bathou kiba lah ban tip shaphang ka jaitbynriew Bathou. U la ong ba ka ‘Ba’ ka mut san bad ‘Thou’ ka mut jylliew, kaba mut, ka science jong ki san tylli ki bynta bad ka jingsngewthuh kaba jylliew ia ki. U la ong ba ka nongrim jong ka jingngeit Bathou jong ki jaitbynriew Bodo ka dei ban ai ka khubor jong ka jingiatylli jong ki san tylli ki bynta. U la ong ba katkum ka jinghikai jong ka jingngeit Bathou, ka Borai Bathou ka don ha baroh kawei ka jingthaw. U Shah u la ong ba kane ka jinghikai shaphang ki san tylli ki bynta ka dei ka jingngeit ha ka jingmane ia ka mariang bad ka lama jong ka jingngeit Bathou ruh ka pyni ia kane. U Shah u la ong ba ka lama Bathou bad ka jingngeit ki ai ka khubor jong ka jingmane ia ki san tylli ki bynta. U Amit Shah ua la ong ba ki san tylli ki jinghikai jong ka jingngeit Bathou ki ialam lynti ia ka ri bad ka pyrthei. U la ong ba ka jingngeit Bathou ka dang jam shaphrang ha ka nongrim jong kine ki san tylli ki khubor jong ka jingshem ba kyntang, ka jinglehniam ba kyntang, ka jingsngewlem ia kiwei, ka jingiathuh hok bad ka jingkyntait ia ka jingisih. U la ong ba ong ba hapoh ka jingialam jong u Myntri Rangbah Duh, Narendra Modi, ka Sorkar India bad ka Sorkar Assam ki ieng skhem ban pynkhlain ia baroh ki niam. U la ong ba katkum ki jingngeit jong ngi ym don kaei kaei kaba kham khraw ban ia ka mariang bad ba ka Sorkar Modi kan leh ia kaba donkam ban pynneh bad kyntiew ia ki niam jong ngi kiba don nongrim ha ka jingmane ia ka mariang, khamtam ha ka thain shatei lammihngi. U la ong ba un leh ia kaba donkam ban iada ia baroh ki niam.
U Myntri ka tnat Kam Pohiing u la ong ba ka jingiakhih ki Bodo ka dei kaba la slem bha bad ba ki jaitbynriew Bodo ki la shem jingeh bha ban iada ia ka deiriti jong ki. U la ong ba ka polisi jong ki Sorkar ba la leit ka dei ban shong ha ka bor da kaba leh klet ia ki kam ba kongsan bad namar kane ka polisi da ki hajar ngut ki briew ki la duh ia la ka jingim. U la ong ba mynta hapoh ka jingialam jong u Myntri Rangbah Duh, Narendra Modi, la soi ia ka jingiakut Bodo Agreement bad ba mynta ka don ka jingshongsuk ha baroh kawei ka Bodoland. U Shah u la ong ba ym pat don kano kano ka jingjia iaumsnam ha Bodoland ha kine ki 3 snem ba la dep bad ba ka Bodoland ka don ha ka lynti jong ka roi ka par. U la ong ba ka khana jong ka roi ka par kaba thymmai ka la sdang hangne. Ka jing thmu jong u Myntri Rangbah Duh ban kyntiew bad wanrah ka shongsuk shongsain ha ka thain shatei lammihngi ka la urlong mynta. U Amit Shah u la ong ba ha ka samoi jong u Myntri Rangbah Duh Modi, ka la don ka jinghiar 73% ha ki jingiaumsnam ha ka thain shatei lammihngi, 71% ka jinghiar ha ka jingiap jong ki dkhot jong ki kynhun pahara bad 86% ka jinghiar ha ka jingiap ki riew paidbah. U la ong ba ka Sorkar Modi ka la soi 9 tylli ki jingiakut iasuk ha kine ki 10 snem ba la dep bad kumba 9000 ngut ki samla ki la iehnoh ia ki atiar bad ki la wanphai sha ka imlang sahlang. U la ong ba namar ka jingiakut iasuk ba la wanrah da ka Sorkar Modi ha ka 27 tarik u Kyllalyngkot, 2020, palat 1600 ngut ki samla ki la wanphai sha ka imlang sahlang. U la ong ba ka Sorkar Pdeng bad ka Sorkar Assam ka la ai ia ka song pisa kaba T 1500 klur na ka bynta ka roi ka par jong kane ka thain. U la ong ba mynta, hapoh ka jingialam jong u Myntri Rangbah ka Assam, Himanta Biswa Sarma, baroh kawei ka jylla ka la don ha ka lynti jong ka roi ka par bad ka shongsuk shongsain. U la ong ba ka Sorkar ka la seng ia ka Bodo Kachari Welfare Autonomous Council, bad mynta ka Sorkar Jylla ka la ai jingithuh ia ka ktien Bodo kum kawei na ki ktien ba pyndonkam ha ki kam ha Assam. La pynkylla ia 10 tylli ki kolej ha ka Bodoland Territorial Region bad la ai jingsiew haduh T. 4 lak ia 4,200 ngut ki dkhot kynhun NDFB kaba la pynduh noh mynta.