Lai ngut ki briew ba don dukan ha Lum Survey, ki la kam ba ki briew ba sah be-ain ha kane ka jaka ki dei ki bym don kot don sla bad bun ki dei ki poiwir na Bangladesh. Ia kane la kynnoh da ki 3 ngut ba don dukan ha Lum Survey bad ka mukotduma ka dang iaid hapoh Court. Ia kane kitei ki briew ki la pynsngew ha u ADC, East Khasi Hills u AG Momin ha ka jingdonlang u Chief Executive Officer ka Shillong Municipal Board u PK Boro, ki heh Pulit na ka East Khasi Hills, ki ophisar na ka Defence Estate Officer (DEO) Guwahati, ki ophisar na Shillong Cantonment Board (SCB), Meghalaya Urban Development Agency (MUDA) bad ki dkhot ka HYC.
Haba kren hadien ka jingjurip u president ka HYC u Bah Roykupar Synrem ula iathuh ha ka jingjurip bad ki heh Sorkar, la shem ba ki don 80 tylli ki longiing bad 40 ki khang tala. U Bah Roy ula iathuh ha ka jingiakren bad ki briew ba sah ha kane ka jaka, ki la iathuh ba bun na ki, ki dei na ka riewngeit Muslim bad ki la kam ba ki wan na Assam, Uttar Pradesh bad kiwei kiwei ki Jylla ka Ri India. U la bynrap kane ka jingwan jurip, ka dei hadien ba ka seng ka la buh por 1 taiew ia ki bor district ban kyndang ia kiba wan sah beain ha kane ka jaka. “Mynta ki bor district ki la sakhi da lade ba kane ka jaka ba dang don ha jingiakhun mukotduma ka dei kaba rit bad kaba don dukan ba pyniaid da ki 3 ngut, namar kata ngi la pynsngew sha u ADC ba dei ban kyndang mardor ia ki 80 iing ba sah beain ha Lum Survey” ula ong.
U Bah Roy ula iathuh na ka liang u ADC u la lum jingkhien ia ka jingdon ki longiing ha kane ka jaka bad un sa aiti ia ka kaiphod sha u Deputy Commissioner (DC) ka East Khasi Hills ban leh ia kaba donkam. Ula ong, ka HYC kan ap ia ka rai jong u DC hynrei lada ki bor district kin dang pynslem, ka seng kan lum paidbah ban wan pynpra hi ia ki longiing ba sah beain ha kane ka jaka. “Naduh ba sdang ka seng ka la ujor sha ki bor district bad sha ka ophis DEO Guwahati ba kam kwah ban iohi ba kane ka jaka kan kylla Them Iew Mawlong ba ar ba kine ki briew kin sah duh ha kane ka jaka. Namar kata ki bor district ki dei ban shim khia ban kyndang ia baroh kiba sah beain ha kane ka jaka” ula ong.
