U Deputy Chief Executive Member ka Khasi Hills Autonomous District Council (KHADC), u Bah Pynshngaiñlang N Syiem ha ryngkat bad ki ophisar, hynne ka sngi ka 22 tarik Naitung u la wan hiar ha Ri-Bhoi District ban jurip ïaki tnad trrikam jong ka District Council Nongpoh bad kumjuh ruh ïaka jaka treikam ka Court jong ka District Council kaba la pynïar shnat daka KHADC ha u snem ba la dep naka bynta ban ai ka jingshakri sha ki paidbah kane ka district.
Haba kren sha ki lad pathai khubor, u Bah PN Syiem Dy. CEM, KHADC u la ïathuh, ka jingwan jong u sha District Council, Nongpoh ka long ban jurip ïa ïing kashari jong ka Council kumba ka KHADC kala pyniar ïaka tnad treikam bad buh ïaka District Council Courts ha man ki district naka bynta ban pynsuk bad pynjan ka jingtreikam sha ki paidbah bad ha katei ka jingjurip naka liang u Dy CEM u la lap ba ki nongtrei ki dang duna bad donkam ban dang pynkhlaiñ ïaki nongtrei ha katei ka tnad.
U la ïathuh ruh hadien ba la ïoh ban ïa kren bad ka Magistrate jong ka District Council Courts ha Nongpoh naka liang u CEM u la lap ba haduh mynta ki don kumba 300 tylli ki mukotduna hapoh ka iingkashari jong ka KHADC ha Nongpoh bad la kumno kumno la donkam ban nang pynkhlaiñ ïa ka rukom treikam dakaba pynbun ki nongtrei naduh ki Computer Assistant, Ki LDA, Bench Assistant bad kiwei kiwei ki nongtrei bad ki jingdonkam.
U la ong ruh, hadien katei ka jing jurip, la lap ba ïa kane ka jaka kaba don ka District Council la donkam ban pynbha ïaka naduh ka jingkynroh ha sawdong jong ka jaka bad kumjuh ki ïing kiba la rim la donkam ban pynbha noh ïaki khnang ba yn ïoh ban pyn treikam noh ha kiwei ki bynta jong ka ka District Council.
