Ki bor pyniaid District ka Ri Bhoi ba la lamkhmat da u Bah A. Myrthong Additional Deputy Commissioner (ADC), lem bad ki ophisar ka tnad Water Resources, ki ophisar ka NHIDCL hynne ka sngi 4 tarik Nailur ki la leit ha shnong Umroi Madan ban jurip ia ki tyllong um kiba lah ban ktah na ka jingpynheh sha u surok Fourlane. Ha kane ka sngi, nalor ki ophisar la donlang u MP ka Shillong Parliamentary Seat u Dr. Ricky AJ Synkong ryngkat ki paidbah nongshong shnong ka Umroi Madan, uba la leit iuhkjat da lade ban sngap ia ka jingeh ki paidbah kiba la ujor ban don ka jingshah ktah ki tyllong um ha katei ka shnong na ka jingpynheh ia ka surok. Lah ban kdew u Deputy Commissioner ka Ri Bhoi District, u Abhilash Baranwal, IAS u la bthah ia u ADC lem bad ki ophisar ka tnad Water Resources ban leit jurip ia ki tyllong umbam ha ka shnong Umroi Madan, hadien ba la don ka jingujor pyrshah ia ka jingthmu shna surok Fourlane da kaba kynnoh ba kan don ka jingktah ia ki tyllong umbam hapoh ka shnong.
Hadien ka jingjurip bad ka jingiatai ba sani na ka liang ki nongshong shnong ki la pynpaw ba kim pyrshah satia haba wan ki kam pynroi, hynrei kaba ki ieng ban pyrshah ka dei tang na ka daw ba kane ka surok fourlane kan ktah ia ki tyllong umbam umdih ba dei tang kawei kaba ki paidbah baroh shitkatta ki shaniah ban ioh umbam umdih. Na ka liang ki ophisar hadien ka jingjurip, ki ong ba kim pat lah ban ong eiei kan ktah ne kan ym ktah bad ki la pynshai ia kane ka kam yn sa sngewthuh hadien ka jingwad bniah da ki riew shemphang halor kane ka kam bad kan shim por ym duna ia ka shisnem bad kin shong pyrkhat halor kane ka kam hadien ka jingaiti ia ka kaiphod sha u DC halor ka jingjurip ia ki tyllong um.
U Bah Ricky AJ Synkong, ula ong kum u nongmihkhmat paidbah hadien ba ula ioh ia ka jingud jingnam jong ki paidbah nongshong shnong ka Umroi Madan halor ka jingeh ba ia dei bad ka tyllong umbam umdih bad ban shna surok Fourlane, ula shimkhia ban kynduh bad donlang ha kane ka jingleit jurip ia ki tyllong ha shnong ka Umroi Madan. Ula bynrap ki paidbah kin kmen eh ban ioh ia ki kam pynroi khamtam kum ka surok, hynrei ki paidbah kim lah pat ban ia peiñ hapdeng ka roi ka par bad ki tyllong umbam umdih kiba long kongsan eh ha ka jingim ki paidbah nongshong shnong. Kumta ka dei ka kamram ki bor ba dei khmih ban wad ia ki lad ki lynti kumno ban weng ia kane ka jingeh ban shna ia ka surok Fourlane bad ban pyntikna ba kan ym don ka jingktah ia ki paidbah bad kyrmen ka jingpyntreikam ia ka surok fourlane kan ym ktah iano iano bad kan long kaba iaid beit.
