U Myntri Rangbah ka Jylla u Conrad K Sangma hynne ka sngi, ula leit jurip ia ki jaka ha West Garo Hills ban peit ia ka jinglong jingman khamtam ba kumba 30,000 tylli ki longiing ki la shah ktah na ka jingshlei um ha katei ka thain̈.U Conrad Sangma ula khmih ia ka jinglong jingman bad ban pynthikna ba ki bor pyniaid district kin ai mardor ia ki jingiarap sha ki lanot kiba don ha Silkata, Namabila bad Haripur.Ki paidbah katei ka thain̈ kila shongsyier haba ka um kala kiew haduh 5-6 phut bad ka um kala rung shapoh ki iingsah ki jongki bad kala tap bad pynjulor ruh ia ki jingthung jingtep baroh.
U Conrad ula pynpaw ba katei ka jingjia ka long ka bym bha namar kumba 30,000 tylli ki longiing kila shah ktah na ka jingshlei um, hynrei ym shym la don pat ka jingduh ia ka mynsiem briew haduh mynta. U Conrad ula iathuh ba ki bor pyniaid district kila trei shitom bad kila shimkhia mardor ban pynthikna ba kan ym don ka jingduh ia ka jingim briew bad kila ai jingiarap ia ki paidbah kiba la shah ktah bad kila ai jaka sah kaba shipor ia ki lanot kiba don ha ki jaka kiba don jingma.U la ong ba ka sorkar kan ai jingkyrshan ia kito ki lanot kiba la shah ktah.
U Myntri Rangbah ym tang ba ula khnih ia ka jinglong jingman ha katei ka thain hynrei ula sam ruh ia ki marbam mardih sha ki paidbah kiba la shem lanot bad ula leit iakynduh ia ki paidbah kiba sah ha ki jaka riehtngen kiba shipor ban pynthikna ba kin ioh ia ka jingiarap mardor.U la bthah ruh ia ki ophisar sorkar ban iatreilang bad ka jylla Assam khnang ba kin lah ban pynkhreh lypa lada jia ba ka jingshlei um kan nang jur.
