Hadien ar taiew ba la leit jurip ha ryngkat ki Bor District ka East Khasi Hills, ka Hynniewtrep Youth Council (HYC) hynne ka sngi ka la hiar kyndang naphang ia ki iing ba kynnoh shna be-ain hapoh ka jaka jong ka Defence Estate Office (Guwahati) ha Lum Survey, Shillong.La iathuh ba ki dkhot ka HYC ki la ioh ban pynpra kumba 60-80 tylli ki iing kiba la kynnoh ki ki dei kiba sah beain hapoh kane ka jaka.Naduh ka por 10 baje mynstep, la sakhi ba ki Nongialam bad ki dkhot ka HYC ki la iatur paidbah sha Lum Surbey bad ki la pynpra ia ki Iing kiba kynnoh shna beain da ki bar Jylla ha kane ka jaka. Kane ka jinghiar kyndang ia kine ki Iing beain, ka la jia ruh hadien ba ki Bor District bad ka Defence Estate Office (Guwahati) ki la shu shong kli kti bad khlem leh eiei wat hadien ba la pynshisha ia ka jingsah beain jong kine ki bar Jylla kiba wan na Assam, Uttar Pradesh bad kiwei kiwei ki Jylla ka Ri.
Lah ban kdew ba ki bor District ka East Khasi Hills lem bad ka Ophis u Defence Estate Officer (Guwahati) ha ka 8 tarik Jymmang, ki la leit jurip ia kane ka jaka ha Lum Survey bad lap da la ki khmat ia ki 80 tylli ki iing ba shna beain.U Additional District Magistrate (ADM), ula lum kyrteng ia baroh ki trai jong kine ki Iing ha Lum Survey ban aiti sha u Deputy Commissioner ba un leh ia kaba donkam.Shuwa kane, ka MeECL ka la leit ban ot lut ia ki bording elektrik jong kine ki Iing hadien ka jingioh pdiang ia ka jingujor na ka HYC namar ki lap ruh dalade ba kine ki iing ki la shu ring tuh ia ka bording khlem da ioh jingbit.Lah ban kdew hangne ba kine ki sienjam ba la shim da ki bor Sorkar ka la wan jia hadien ka jingdawa jong ka seng Hynniewtrep Youth Council (HYC) ban kyndang ia baroh ki iing ba shna beain ha kane ka jaka (Lum Survey).Ha ka jinghiar jurip ki bor District, ka HYC ka la maham lypa ba lada ki bor District bad ka DSO kim leh eiei pyrshah ia kine ki Iing beain, ka seng kan shim hi ha lade ia ka kam ban kyndang ia kine ki briew.
Kawei pat ka khubor ka iathuh hadien katto katne kynta ba ka seng Hynniewtrep Youth Council (HYC) ka la leit pynpra ia kumba 60-80 tylli ki iing ha Lum Surbey, la ioh khubor ba ka tnat Pulit ka la pynngat case pyrshah ia ki Nongialam.La iathuh ba kane ka jingshah pyngat Case ia ki nongialam ka HYC ka dei namar ba la khein ba kane ka jingleit kyndang jong ka HYC ia ki iing ha Lum Surbey ka long beain.Halor kane u Superintendent of Police (SP) ka East Khasi Hills Rituraj Ravi ula iathuh ba ia ka Case la Register hapoh ka Sadar Police Station.La pyntip ba ki Nongialam ka HYC kiba la shah pynngat case ki kynthup ia u President Roy Kupar Synrem, Vice President Donbok Kharlyngdoh, Assistant General Secretary Isaac Basaiawmoit bad bun kiwei.Halor kane, ka jingtohkit ka dang iaid shakhmat.
