Ki nongïalam jong ka Voice of The People Party VPP kiba kynthup naduh u President Rangbah u bah Ardent Miller Basaïawmoit, U bah Brightstarwell Marbaniang MLA ka Mawlai lem bad kiwei kiwei hynne ka sngi ka 25 tarik Naitung ki la wan hiar ha Nongpoh ban pyrta ïaka sur ai khublei bad ka sur sngewnguh sha ki paidbah jong ka dong bad ka thaiñ Ribhoi halor ka jingkyrshah jong ki ban pynjop donburom ïa u Dr. Ricky AJ Syngkon kum u MP jong ka Shillong Parliamentary Seat. Haba kren ha katei ka jingïalang paidbah kaba la long ha Ïewmawlong,Nongpoh, naka liang u President Rangbah jong ka Voice of the People Party u bah Ardent Miller Basaïawmoit u la ai ïaka jingkhublei ïaki paidbah kiba la ai jingkyrshan kaba pura ha baroh 5 tylli ki konstituensi kiba don hapoh ka Ribhoi. U la ong ruh, haba sdang ïaki jingïalap haki rynsan election kiba bun na kiwei ki party ki kheiñ troiñ da kaba ong ba ka Voice of the People Party kan nym poi shano shano ruh. Ynda la poi ka sngi ban niew ïaki vote kita ki party kiba kheiñ troiñ bad kiba ong ba ka VPP kan nym poi shano shano ki la shaïong ngaiñ ba ka VPP ka la tam haduh 3 lakh tam vote bad don napdeng Jong ki, ki dang sah kut haka jinglyngngoh haduh mynta.
Kane kadei ka bor Jong u Paidbah bad ym don ba lah ban pyntieng lane ban pynjop daka pisa ha kmat u paidbah bad Ka jingjop jong ka Voice of the people party ha kane ka Election MP ka la dei shisha ka jingjop jong u paidbah, Ong u bah Ardent. Shuh shuh u la Ong, Haba ngi phai sha ka jingïoh ïaki vote ha baroh 5 tylli ki konstituensi ha Ribhoi ngi ïohi baka don ïaka jingkyrmen ba ka VPP ka thmu ban wan rah ïaka jingkylla, wat haka konstituensi Jirang kaba la bun ka jingïakhleh ngi dang lah ban ïoh daki hajar vote bad kane ka pyni ba u paidbah um dei shuh uba biej bad u la stad bad u la nang ban jied ïa kum kino ki nongïalam ba ka jylla jong ngi ka donkam.
U Bah Ardent u la Ong ruh, ka Party VPP kadei ka party kaba don ïaka jingkitkhlieh naka bynta u paidbah bad ka jingthmu kaba ha khmat eh ka long ban wan rah ïaka jingshynshar paidbah kaba khuid. Mynta ka kynti ngi la iohi ba ki paidbah ki la ngiah ïaka jingshukor na ki nongïalam bad ki la thrang eh ban wan rah ïaka jingkylla. Ula ong ruh, ba ki bun ki ba la kynthoh ïa ka VPP bad ki ba pyrshang ruh ban pynduh jingkyrmen ïaki paidbah da kaba ong, un leh aiu u VPP marwei haka Parliament, hynrei mar sien sdang ka Dorbar nyngkong ngi la iohi ba u MP Jong ngi u Dr. Ricky Syngkon u la ïeng ban kren naka bynta ka jaidbynriew Jong ngi. Kane ka long ka burom ïangi kiba la shaniah haka VPP, La ong u Bah Ardent. U Bah Ardent ha katei ka jingïalang, u la kren ruh halor ka jing ai jait kpa dakaba ong ba ki la don kiba pynsngewthuh bakla ïa u paidbah ba lada jop ka VPP haka jylla kin sa pynkylla Jait kpa lut, U ba Ardent u la ong ba mynno ngi la buh ïa Kane kum ka mat Jong ka VPP ban pynkylla jait kpa, Ka Party VPP kan nym tukla ïaka kam shimet la u ai jait sha u kpa ne sha ka kmie kata ka shong haka kam shimet, hynrei ngin pdiang beit ïaki kum u Khasi.
U bah Ardent u la pynsngew sha ki paidbah, ba wat hapdeng ka jingshah kynthoh bad ka jingthmu ban pynsngewthuh bakla ïa u paidbah, kum ki nongïalam Jong ka Voice of the People Party kan ïeng skhem ha la la nongrim ban trei naka bynta u paidbah. Haba ngi peit ïa ka jingïoh jingkyrshan na u paidbah ngi don ka jingkyrmen ba ngin jop ïaka election MDC bad Election MLA ki ban sa wan, “La ong u Bah Ardent”.
