U Myntri ka sorkar jylla u Rakkam A. Sangma bad u MLA ka Chokpot u Sengchim N. Sangma hynne ka sngi ki la leit sha shnong Atisia Songmong, South Garo Hills District ban pynpaw ia ka jingsngewlem halor ka jingkhlad noh ki 7 ngut na ka jingshah tap twa khyndew. U Rakkam bad u Sengchim ki la leit peit ia ka jinglong jingman katei ba jia ka jingjia bad ki pynpaw ka jingsngewlem ia ki ba haiing ba hasem ka longiing kaba la duh noh ia 7 ngut ki mynsiem briew ba la shah tap na ka jingtwa khyndew ha ka 4 tarik mynta u bnai.
Ki la iakren ruh bad ka kynhun NDRF ba don ha katei ka jaka bad la iathuh baroh kiba don ha katei ka iing ki la khlad noh na ka jingshah tap ha ka khyndew bad wat tang ia ka tnum iing ruh ym lah shuh ban iohi namar ba ka jingban ka khyndew kaba la twa kynsan.
Ki la iathuh ki 7 ngut kiba la khlad noh na ka jingwan ki kynthup ia ka Silji R Marak (60 snem), ka Merina R Marak (39 snem), u Sama N. Sangma (50 snem), ka Chengbe R Marak (22 snem), u Desrang R Marak (14 snem), ka Silbera R Marak (8 snem) bad i khunlung Dimse R Marak ba dang shisnem shiteng.
