Ka Meghalaya Lokayukta hynne ka sngi ka la hukum ia ka Tnad Housing ban pynthikna ba kam dei ban pynkit ne sam ia ki tin sop iing aluminium sha ki nongioh skhim kat bym pat dep ai ti ia ka kaiphod tohkit hapoh ka 3 tarik u Nailur.
Ha ka hukum, u Chairperson ka Meghalaya Lokayukta Bah Bhalang Dhar ula bthah ia u Deputy Superintendent of Police (Crime) Bipul Das, ban pynlong ia ka jingtohkit halor ka jingkynnoh pynpoi ia ki tin sop iing ba tad dor bad bym bha sha ki Community & Rural Development (C&RD) Block jong ki 7 tylli ki District ka Ri-lum Khasi bad Jaintia.
“La khmih ia ka shithi ba 28 tarik Jylliew, ba la ioh pdiang na ka Ophis ka Director General of Police Meghalaya, kaba la thung ia u Bipul Das, MPS, Deputy Superintendent of Police (Crime) sha ka Lokayukta. La bthah ia u Bipul Das ban pynlong ia ka jingtohkit bad halor ka mar, ki jingtip bad ki kot ki sla ba lum, un pan ia ki jingbatai halor ki jingkynnoh ba la pynmih ha ka phom ujor bad hadien ba ioh pdiang ia ki na ki Ophisar ba dei khmih, un aiti ia ka kaiphod hapoh ka 3 tarik Nailur 2024” ula ong.
“Haba ia dei bad ki tin sop iing ha ki kudam, dei ban buh beit ia ki kumba ki long haduh mynta, kata, ym dei ban pynkit ne sam ia ki tin sop iing sha ki briew ba dei ban ioh” ong u Bah Dhar ha ka hukum. Ia kane ka hukum la pynmih hadien ka jingujor ba la mudui da u President ka Hynniewtrep Youth Council (HYC).
