Ryngkat shityllup ka pyrthei ka tnat treikam ka Red Cross ha jylla Meghalaya ka la rakhe ia ka sngi kha u nongseng jong ka Red Cross Movement, u Henry Dunant ba la tip kum ka ‘World Red Cross Day’ ha Raj Bhavan, Shillong hynne ka sngi. U Lat ka Jylla u Phagu Chauhan, uba long ruh u President ka shnat Meghalaya jong ka Indian Red Cross Society, ula shim ia ka bynta kum u kongsan ha ka jingdonlang bah Shanbor Shullai, MLA, Principal Secretary u Lat Harish Chandra Choudhary, IFS, u President ka Red Cross Society Shillong, u bah R.O. Wahlang, ki ophisar rangbah, ki dkhot ka Red Cross Society bad ki nong shah khor sngewbha.
Haba ai jingkren u Lat ka jylla ula pynkynmaw ia ki mat treikam jong ka Red Cross Society naduh ba sdang. Ka matpdeng jong kane ka jingrakhe ka long, “Ban pynim ia ki para briew”, ula iaroh ia ki nongkyrshan kiba ju trei shitom bad ka jingaiti ki dkhot ba ban pynurlong ia katei ka jingthmu jong ka Red Cross. U la bynrap ka jingiai bteng ka kynhun ban ai jingiarap ia kiba donkam eh ha ki shnong, ki jylla bad ha kylleng ka pyrthei ka long kaba kongsan. U Lat ula kyntu ia baroh ki khynnah pule ba don bynta bad ka kynhun ban aiti bad trei na bynta ka lawei ban wan.
Haba pynpaw halor kane ka mat pdeng jong ka jingrakhe “ban shakri bad pynim ia ki para briew” ka pynsngewsih bad sngewsynei ban pynkynmaw ia ka jingdonkam kumno ba shakri da ka jingsngewkhia na bynta ka jingbha ha ka inlang sahlang. U Lat ula kyntu ia ki dkhot ban don ka mynsiem iarap lem namar ki briew ki long kumjuh hynrei ka donkam ka jingiatreilang ban pynim ia ki mynsiem briew ha ka imlang sahlang.
U Chairman jong ka Meghalaya Branch jong ka Indian Red Cross Society, u bah RO Wahlang, IFS (Rtd) ha ka jingkren pdiang ula iaroh ia ka jingtrei ki nongialam mon sngewbha ka Red Cross ha kylleng ka pyrthei bad ula pynpaw ba donkam ban pynkhlain shuh shuh ia ki nongtrei. Ha kane ka jingialang u Lat ula pyllait ia ka lama jong ka World Red Cross bad ai syrnod ban long dhot shi jingim ia ki dkhot thymmai jong ka Meghalaya Red Cross Society ha ki 61 ngut. Ha kane ka sngi u Lat ula ialam ban pule ktien smai ‘World Red Cross Day’ bad la ioh ia ki jingrwai bad shad tynrai da ki khynnah skul ban pynphuh pynphieng ia ka porkram.
