Ba dang iai bteng ka jingdon jong ki nongñiah thukthuk kiba ju wan ban ñiah sted ne pynher ha u surok bah National Highway-06 ha Ri Bhoi District khamtam ha ki sngi U Blei, ka tnad pulit jong ka Traffic Branch ka Nongpoh Police Station ka la nang bteng ban ia ka jingtalasi bad ban peitngor ia kito kiba pynkheiñ ia ki kyndon katkum ka Motor Vehicle Act. Ia ka jingtalasi, ki bor ka Traffic Branch ka Nongpoh Police Station, mynta ka 11 tarik u Nailar, ki la pynlong hapoh ka surok bah NH-06 kaba hap ha ka shnong Quinine ha kaba la ioh ruh ban daiñ kuna da ki phew tylli ki nongñiah thukthuk kynthup ruh ia ki nongñiah kali kiba la pynkheiñ ia kane ka Motor Vehicle Act.
La ioh jingtip na ki bor pyniaid ka Nongpoh Traffic Branch, ba ki la hap ban iai bteng ia ka jingtalasi bad ban bteng ia ka jingpeitngor ia kito ki nongñiah kali kiba ju mlien ban pynkheiñ ia kane ka kyndon, ka la long ruh ba ki bor pulit ki la nang ioh ia ki jingujor na ki riew paidbah halor ka jingdon jong kum kine ki nongñiah kali ne ki thukthuk kiba ju ñiah khlem akor ia la ki kali ne thukthuk ha ki surok bah bad buh jingma ia ki paidbah nongleit nongwan bad kiwei kiwei khamtam ha ka sngi U Blei.
“Ngi la nang bteng ban peitngor bad ban talasi ia kum kine ki nongñiah thukthuk kiba ju mlieh ban wan pynher ia la ki thukthuk ne ki bikes ban pynlong ia ka surok bah NH-06 kum kita ki stunt track da kaba buh jingma ym tang ialade hynrei ia kiwei ki nongleit nongwan khamtam ki khyllung khynnah bad ruh ia kiba ñiah ia ki kali saw shaka ruh kiba ju mlien ban ñiah kali khlem da pyndonkam ia u seat belt ne wat ban ñiah kali hapdeng ka jingshoh khowiang bad kiwei kiwei, bad ngi la daiñ kuna ia kito kiba shah bat bad ngin nang bteng ban khynra ne peitngor ia kum kine ki nongñiah kali kiba iaid khlem akor ha u surok bah ha Ri Bhoi district”, ong u heh pulit.
