Iaid kjat ka RBTDF na Pahambir sha Krem Lymbit Pnah Kyndeng

Ban nang kyntiew ia kawei na ki jaka jngohkai pyrthei kaba la bna nam ha Ri Bhoi District kaba la tip kum u lum Pnah Kyndeng ka Law Kyntang kaba don ruh ia ka krem lymbit hapoh ka shnong Pahamskhen, na ka liang ki nongialam ka Ri Bhoi Tourism & Developmental Forum (RBT&DF) ka la pynlong da ka jingiaid kjat kaba 5 kilometer naduh ka shnong Pahambir ter ter shaduh u tei u lum Pnah Kyndeng. Ha kane ka jingiaid kjat ba la pynlong da ka RBT&DF la shimbynta lang da u Bah Bansynsharlang Nongkynrieh, Officer ka tnat Tourism, ki nongialam ka RBT&DF ba kynthup ia u Bah Plielad Tiesoh kum u Chairman, ki Nongthoh Khubor nalor ki riew paidbah kiba la iasnohktilang ban iaid sha u tei u Lum Pnah Kyndeng. La wan ban pynshit pynshngain pat, ha kane ka prokram hadien ka jingiaid kjat da u Bah Paul Lyngdoh, Myntri ka tnad Tourism bad Arts & Cultures kum u kongsan lem bad u Bah Mayral Born Syiem, MLA ka Nongpoh Konstituensi kiba la leit ruh ban jngoh dalade ia ka krem ba shong basah da ki hajar tylli ki sim lymbit mynta da ki phew snem u ba don hapoh kane ka Law Kyntang Pnah Kyndeng. Haba kren ha ka jingialang kaba la pynlong ha kane ka Law Kyntang, u Bah Mayral Born Syiem u la ai ia ka jingiaroh ia ki nongialam ka RBTDF kiba la nang shimkhia na kawei ka por sha kawei pat ban nang kyntiew ia ki jaka jngohkai pyrthei kiba don hapoh ka them Ri Bhoi District khamtam ia u ne u Lum Kyntang Pnah Kyndeng u ba don ruh ia ka krem Lymbit kaba la bna-nam hapoh ka shnong Pahamskhen lyngba kane ka jingiaid kjat kaba 5 kilometer kaba la pynlong kyrpang ban kyntiew ia kane ka jaka jngohkai pyrthei. U la ong ruh, ba ka jingkordor jong ka jinglong jong ki jaka ki lum jong ka Ri Khasi kaba ieid jong ngi, ka jingdon jong kane ka krem hangne ka pyni ia ka jingriewspah mariang, ka jingdon jong ki lymbit kiba shong sah ha kane ka krem ka long kaba kyrpang ka ai mynsiem ia ki nongshong shnong, na ka jingshimkhia u Myntri ka tnat Tourism bad u Director ki ophisar ban wan jngoh hi dalade sha kane ka jaka ki la ioh ban sakhi dalade ia ka jingitynnad bad ka jinglong kyrpang jong kane ka krem kaba lah ban long kum kata ka Circuit jong ka Tourism lane ka jaka jngohkai pyrthei bna nam.

Kum u Nongmihkhmat ka thain Nongpoh, u la pynpaw, ba ia kane ka jaka lada lah ban pynbha ban pynitynnad kan kyntiew shisha ia ka kam jngohkai pyrthei bad kaba donkam eh ka long ka surok ban pynsuk ia ka leit ka wan jong ki nongjngohkai pyrthei ban poi sha kum kine ki jaka nalor ka jaka pynieng kali, ka jaka leit bar ba tikna kiba dei ki jing donkam kiba ha khmat ban pynbit pynbiang katkum ki jing donkam ha ka phase wise. “Ngi donkam ruh ban pynkylla ia ka rukom pyrkhat pyrdain lada ngi kwah ban kiew ha ka liang ka kam jngohkai pyrthei namar teng teng ngi ki nongshong shnong bunsien ngi ju ibein ia kiba wan na kiwei pat ki bar jylla hynrei ngi dei ban nang ban pdiang sngewbha ban pdiang burom ia kum kine ki briew kiba wan na kiwei ki jaka ban ai jingmyntoi ha kiba bun ki liang”, ong u Bah Mayral Born Syiem. Haba kren pat kum u kongsan, u Bah Paul Lyngdoh, u la pynpaw ia ka jingkmen ban ioh ban sakhi dalade ia kane ka Law Kyntang Pnah Kyndeng bad ia ka krem lymbit bad ban ai jingiaroh ia ki dkhot ka RBTDF kiba la shimkhia ban nang pynpaw paidbah ia kane ka jaka kaba lah ban long kawei na ki jaka jngohkai pyrthei kaba bna nam ha kane ka district bad ka jylla Meghalaya. U la ong ruh, ba ka jylla Meghalaya ka la rung ha ka juk jong ka jingkylla ha ka liang ka synshar khadar, namar kum ki nongshong shnong kim shaniah shuh tang ha ka kam sorkar, ne tang ha ka liang tih marpoh khyndew hynrei mynta ki paidbah ki la phaikhmat sha ki kam ki jam ban pynmih ia ka kamai jakpoh lane ka ioh ka kot kaba neh shyrta kaba la tip ruh kum ka Sustainable Livelihood lyngba ki jingdon jong ki kam hapoh ki shnong ki thaw (Local economy).

 “Ngin phaikhmat sha ka thain Sohra baroh shikatta ha ki snem ba la leit noh ki la shaniah ban ioh ia ka kamai kajih lane ka ioh ka kot lyngba ki kam tih dewiong, mawshun hynrei mynta ki la sngewthuh shaid ba kine ki kam kim long kiban neh shyrta khamtam sa ka jingduh bor noh sa ka karkhana pynmih cement ka MCCL bad mynta ki nongshong shnong ki la phaikhmat ban pynim ialade lyngba ki kam seng shimet ban phaikhmat sha ka kam jngohkai pyrthei lyngba ka jingpynmih ia ki jaka kiba itynnad, ki jaka sah jong ki tourist, ki jaka bam bad kiwei kiwei kiba la iaid lyngba ka kam jngohkai pyrthei”, ong u Bah Paul Lyngdoh. U Bah Paul Lyngdoh u la ong ruh, ba dei tang u biej u ba shong ha ka par ksiar hynrei u ud ba u Duk u rangli lada um pyndonkam hi ia la ka jong ka spah kiba don ha la ki shnong ki thaw kumba long kum ha kane ka Law Kyntang jong ka Pnah Kyndeng, kane ka Ri Khasi jong ngi ka dei kaba riewspah bad kaba la ioh ia ka jingkyrkhu kyrpang na u Blei Trai Kynrad hynrei ka shong ha ngi ban pyndonkam pat ia ka bad ban ri sumar ia ka, da kaba kular ruh ban treishitom ban pynurlong ia ki jingdonkam ha kane ka Law Kyntang katkum ka dorkhas ba la buh ha kane ka sngi.