Ka seng ki samla pule ka Meghalaya Koch Students’ Union (MKSU) hynne ka sngi ka la pynlong ka jingiaid paidbah ha Ampati, South West Garo Hills District. Kane ka jingiaid paidbah ka long ban pynrem jur ia ki nongshah leh beijot ia ka khynnah ha ka 16/Iaiong/2024 ha ka tamasa Chenga Benga Mela ha ka shnong Gandhipara hajan Garobadha ha kaba ki runar ki la leh beijot ia ka khynnah.
Ha kane ka sngi da ki hajar ngut ki briew ki la shim bynta kynthup ki seng bhalang bapher bapher kum ka Meghalaya Koch Association, Meghalaya Koch Women’s Association, All A’chik Youth Federation, Meghalaya Hajong Welfare Association, Garo Students’ Union, A’chik Holistic Awakening Movement bad ka Ampati Youth Welfare Organization.
Ka jingiaid paidbah ka la sdang na Ghasura Cultural Centre bad la pynkut ha ophis jong u Deputy Commissioner ha Ampati bad la ioh ka jingkren na ka nongialam ki seng bapher bapher. Ha kane ka jingialang ki la raoi ban dawa ban pynshitom ia ki runar ba donkti ban pynioh ia ka jingbishar hok ka khynnah, ha kajuh ka por la dawa ba dei ban pynkhlain ia ki lad jingiada ia ki kynthei khynnah bad ki la ai ka dorkhas sha u Deputy Commission, South West Garo Hills.
