Ban pynrem jur ia ka jingshah pyniap dusmon u wei na ki nongshong shnong ka Erpakon, Ri Bhoi District mynta ka sngi ka 17 tarik Jymmang, na ka liang ka Dorbar Shnong Erpakon ka la pynlong da ka jingialang paidbah bad ruh da kaba iaid rally paidbah na Madan football shaduh surok bah National Highway 06.
Ha kane ka jingialang bad ka jingiaid paidbah la wan ban shim bynta da ki nongialam sengbhalang bapher bapher napoh ka Ri Khasi Jaintia, ki Seng Longkmie, Seng Samla, ki riew pawkhmat ka Ri Bhoi District bad kiwei lem bad ki khynnah skul na ka shnong Erpakon.
Ki nongkren ha kane ka jingialang, ki la pynrem jur ia ka jingshah pyniap dusmon u Kyrmen Lyngdoh Nonglait (Bam Kwai Ha Dwar u Blei) ha u wei u Bar Jylla ba la tip kyrteng kum u Raju Rajbhar ha ka miet 11 tarik Jymmang bad ki la phah ruh ia ka khubor sngewlem sha ka longiing u Bah Kyrmen uba la iehnoh shadien ia la ka kurim bad 7 ngut ki khun ba dang rit.
Kum ki nongialam sengbhalang, ki la ai jingiaroh ruh ia ka jingshimkhia ka Dorbar Shnong ha ryngkat ki Seng Longkmie bad Seng Samla ban pynlong ia kum kane ka prokram ban pynrem ia u tei u bar jylla u ba la shim ia ka jingim ba kordor jong u Bah Kyrmen bad ruh ban ai ia ka Khubor sngewlem sha ki ba haiing hasem jong u Bah Kyrmen Lyngdoh Nonglait.
Shuh shuh ruh, ki nongkren ki la khot la wer ia ka Dorbar Shnong, Seng Samla bad Seng Longkmie ha ryngkat ki sengbhalang ban ia tylli ban peitngor ia ki bar jylla ba wan rung ban leh ia ki kam sniew wat haduh ban shim ia ka jingim jong ki nongshong shnong ka jylla. Ki la ai jingmut ruh ban leit buh ka jingkyrpad sha ka ophis u DC bad Social Welfare ban pynioh ia ki lad jingiarap ia ka longiing jong u Bah Kyrmen Lyngdoh Nonglait bad khatduh ki la kyrpad ia ka tnad pulit ban pyn shitom da kaba tyngeh bad ban set along shirta jingim ia u Raju Rajbhar.
Hadien ka jingialang, la pynlong pat ka jingiaid rally naduh Madan football Erpakon shaduh u surok bah National Highway 06 bad la pynkut ha dhaba ba u Raju Rajbhar u trei bylla bad thang ruh ia ka dur jong u kum ka dak ban pynrem bad kyntu ia ki bor ka ain ban set along shirta ia u ne u riew thrang snam.
