Ka jingialang ki heh shipai Inspectors General BSF-Region Commanders BGB Level Border Co-ordination Conference hapdeng ki heh shipai ka ri India bad Bangladesh ka la long hynne ka sngi ha BSF campus, Umpling, Shillong. Ia ka kynhun jong ki shipai ka BGB la ialam da u Additional Director General jong ka Region Commander ka South East Region, Chattogram ha ryngkat ka jingdonlang jong ki 12 ngut ki heh shipai. Katba ia ka kynhun ki BSF la ialam da u Patel Piyush Purusottam Das, IPS, IG BSF Tripura Frontier ha ryngkat ka jingdonlang jong ki 12 ngut kiwei pat kiba kynthup ia ki heh BSF na Meghalaya, Silchar bad Tripura bad ki nongmihkhmat na ka MHA, MEA bad NCB.
Ka kynhun jong ka Border Guard Bangladesh kaba la wan poi hynne ka sngi, ka la shah pdiang sngewbha ha ki heh ophisar jong ka BSF ha ICP Dawki bad hadien kane, katei ka kynhun ka la leit sha Umpling BSF Campus, Shillong ban iashim bynta ha ka jingialang jongka Co-ordination Conference ba saw sngi ka ban kut ha ka 4 tarik u Naitung. Kum ban pynpaw ia katei ka jingialang la pynlong ar sien ha ka shisnem hapdeng ki shipai BSF bad ki BGB ban iatai ia ki jingeh bad ban iatreilang ia ki jingeh ha ki thain khappud hapdeng kine ki ar tylli ki ri.
Ka jingthmu ba kongsan jong ka jingialang ka long ban pynklain ia ka jingiatreilang ban iakhun pyrshah ia ki kam sniew ha khappud India-Bangla, bad shim ki lad ki lynti ban tehlakam ia ki kam khaii tuh bad ka jingwan rung tuh ki nong Bangladesh sha India. Kane ka jingialang kan kut ha ka 4 tarik u Naitung hadien ka jingiasoi ia ka Joint Record of Discussion (JRD) hapdeng ki nongialam na kitei ki ar tylli ki Ri.
