Ïakynduh ka BJP-NPP ban pynjop don burom ïa ka Agatha

Ki nongialam ka seng NPP bad BJP, ki la iakynduh lang ha Tura na ka bynta ban iatreilang ban pynthikna ba ka Agatha K Sangma kaba dei ka kyrtong ka NPP kan jop don burom na Tura Parliamentary Constituency haka ilekhson MP Lok Sabha. Kane ka jingiakynduh kine ki nongialam na kine ar tylli ki seng kidei kiba don lang ha ka kynhun National Democratic Alliance (NDA) ha ka sorkar pdeng bad ha ka kynhun Meghalaya Democratic Alliance (MDA) ha ka sorkar jylla.

U Sabyasachi Ghose u Convenor ka State Media Cell jong ka BJP Meghalaya Pradesh ula pyntip ba ha katei ka jingiakynduh ia ka BJP la ialam da u State President u Rikman G Momin bad ia ka NPP la ialam da u National President u Conrad K Sangma uba long ruh u Myntri Rangbah ka jylla. Ula ong ba katei ka jingiakynduh lang ki nongialam ka NPP bad BJP kadei ka sien ka baar hapdeng ki nongialam kiba hakhmat eh jong kine ki seng saiñ pyrthei kata hadien ka jingialang kaba nyngkong kaba la long ha nongbah Shillong.

U Conrad K Sangma ula pynkynmaw ha ka jingialang ia ka jingiadei kaba iajan ba u don bad u Myntri Rangbah Duh ka Ri, ka jingiadei kaba iaid palat phew snem, bad kdew ruh ba man ki vote ia ka kyrtong NDA ka dei ka jingpynthikna ia ka jingshaniah ki paidbah ia u Narendra Modi, ka jingpyrkhat kaba iahap bad baroh ki nongtrei jong ka BJP hapoh ka Jylla bad ka Ri. Ula iaroh ruh ia u Rikman G Momin, uba la trei shitom ban wanrah ia ka jingiatreilang kaba iaid beit iaid ryntih bad u President ka BJP Meghalaya marwei, ula trei shitom ha kaban pynthikna ia ka jingjop jong ka NDA kaba dei ban long ka nuksa ia baroh.

Katba u Rikman ula pynshai halor ka khubor kaba la pynmh da kawei ka kot khubor kaba kam ba ka jingpdiang ia ki arngut ki MDC ka BJP ka dei ka kynhun bala buh da ka BJP kum ka jingsiew kylliang ban kyrshan ia ka Agatha Sangma ha ka por elekshon. Ka BJP kala thalain ruh ia u Nongialam ka TMC u Dr Mukul Sangma uba la kynnoh ba u kyrtong ka Congress u Bah Vincent Pala u dei u nongprat lynti ban don ka jingiatreilang hapdeng ka BJP-NPP-Congress ha Meghalaya. Ha katei ka jingialang la wan iashimbynta da baroh arngut ki MDC ka BJP ba kynthup ia u Bernard Marak bad u Benedict Marak bad palat 300 ngut ki nongtrei jong ka party.