Ka Hill State People’s Democratic Party (HSPDP) hynne ka sngi kala kyntu ia ka sorkar jylla ban shimkhia bad ka sorkar Assam ban sdang biang ia ka jingiakren pynbeit ia u pud u sam ha ka wat ka baar. Ka HSPDP ka la pynpaw ia katei ha ka jingiakynduh ia u Myntri Rnagbah ka jylla u Conrad K Sangma, hapoh ka jingialam u President ka seng u Bah KP Pangniang ha kaba la iadonlang ki MLA ka seng kiba kynthup ia u Bah Methodius Dkhar bad u Bah Shakliar Warjri bad ki nongialam ka HSPDP. Haba iakren bad ki nongthoh khubor u Bah KP Pangniang ula ong, ba ka seng kala kyntu ia u Myntri Rangbah ka jylla ban bteng biang ia ka jingiakren pynbeit pud bad ka jylla Assam na ka bynta ki jaka kiba dang sahteng ha ka wat ka baar. Ula ong ba ka jingdon ka seng naduh ka sorkar MDA-I bad ka seng kala iatreilang halor ka nongrim jongka seng bad ka sngewnguh iaka sorkar MDA ba kala shimkhia iaka ishu jong ka seng bad kala lah ban don ka jingiasngewthuh jingmut hapdeng ka sorkar Meghalaya bad Assam ha kaban pynbeit ia u pud ha ki 6 tylli ki thaiñ.
“Mynta ka sngi, ngi la wan ban kyrpad biang ia ka sorkar ban shimkhia kloi noh ban iakren pynbeit ia u pud ha ka wat ka baar kaba kynthup ia ki 6 tylli ki jaka kiba don hapdeng ka jingiakajia” ong u Bah KP Pangniang. Ula ong, ba u Myntri Rangbah ula pynthikna ia ka seng HSPDP ba yn shimkhia noh mardor bad ka sorkar Assam ban sdang noh ia ka jingiakren pynbeit pud bad yn yn sa leit iakynduh ia u Myntri Rangbah ka Assam na ka bynta ban iakren pynbeit ia ki 6 tylli ki thain kiba dang sahteng ban pynbeit noh ia u pud u sam. U Bah Pangniang ula pyntip ba lah dep ban thaw ia ki Regional Committee da ki artylli ki sorkar jylla bad u Deputy Commissioner ka West Khasi Hills ula dep lum ia ka jingialang jong ka regional committee bad kila long ruh kiba la pynkhreh ban aiti noh ia ki kot ki sla sha ka jylla Assam ha ka jingialang kaban wan.
Ha kaba iadei bad ka jingdon ki shnong kiba hap ha ka Langpih Sector kila phah da ka jingthoh ba ki kwah ban hap noh sha ka jylla Assam, na ka liang u Nongialam ka HSPDP ula ong, “Ngim lah ban len ki don kum kita ki shnong kiba kwah ban hap noh sha ka jylla Assam hynrei na ka liang ka jong ngi, ngi iai kyntu ia ki paidbah ba kumba ngi la ia long lang mynta la palat 50 snem naduh ka por ba ialam u Bah HS Lyngdoh (bam kwai ha dwar u Blei) kum u MLA ka thaiñ. Mynta ka mih ar sur ngi sngewsih ia kane, hynrei ngi kwah ba kin don ryngkat lem bad ngi bad ngi ngeit skhem ba kiba bun bah ki shnong ki ieng bad ngi haduh kaba kut”.
