Halor ka mat ka jingpynslem da ka sorkar jylla ban pynmang noh ïa ka mang tyngka naka bynta ban shna pynbha ïa u Surok Mawrong u bah Charles Marngar MLA ka Mawhati Konstituensi, u la pynlum ïa ki khlieh nong shynshar shnong jong ki 15 tylli ki shnong kiba hap hapoh ka Mawrong Road Area lem bad ki 5 tylli ki shnong kiba don sha ka thaiñ Mawtari Thaïang kiba ju pyndonkam ïa u surok mawrong ban ïaid ban ïeng. Ïa katei ka jingialang la pynlong hynnin ka sngi ha 24 Tarik Naitung 2024 ha ka ïing Dorbar Hall jong ka Shnong Rtiang, Ribhoi District. Hadien katei ka jingïalang kaba la ïoh ban ïathir ïatai sani bha halor katei ka mat, ha kaba la ïoh ruh ban pan jingmut naki nongïalam shnong ki la leit pat ban jurip ïa utei u surok haki bynta kiba la kham sniew kaba sdang naduh ka bynta ba kut ka Surok rong ka Shnong Rtiang bad kaba kut haduh ka Shnong Nongsangu kaba don ia ka jingjlan kumba 25.Km ei ei. Haba kren naka liang ki arngut ki nongïalam shnong kiba kynthup ia U Rangbah Shnong Syngku U Bah Klurban Shadap bad U Bah Spalton Laloo Rangbah Shnong Langsaw, ki la ïathuh ba une u surok u la kot sha ka 25 snem tam naduh ba la ïoh ban siang bad haduh mynta kim shym la ïoh ïa kino kino ki lad ban maramot bad ka jinglong jingman jong une u surok ka la long kaba I sangsot bad kaba la wan rah ruh shibun ki jingeh naka bynta u paidbah uba pyndonkam ïa une u surok khamtam haba kit ïaki nongpang.
Kitei ki nongïalam shnong ki la ong ruh ba lada ka Sorkar kumba ka la kular ban pynïoh ïa une u surok uba ki paidbah u la angnud kan dang slem bad lada ka sorkar kan dang iai leh mynthi halor kane ka mat, Ha ryngkat da ka jing ia sngewthuh jingmut lang bad u MLA kin rai pat ban shim da kiwei ki lad ki lynti kaba kham tyngeh ban dawa pynurlong noh ïa une u Surok. U MLA/MDC la Mawhati u bah Charles Marngar u la ïathuh, ba haka 6 tarik October jong u snem ba la leit u la dep ban ïa kynduh ïa u Myntri jong ka tnad PWD Road u bah Prestone Tynsong ha ryngkat ka jingthoh ban kyrpad na u ban pynmang skim noh ïa une u surok, ha kaba na ka liang u bah Prestone u la iathuh, ba ia u Surok Mawrong la dep ban pynrung ha ka Scheme PMGSY ha ka Phase -3, bad la khmih lynti ba yn ioh noh ia ka Surok naduh ki Bnai tlang jong u snem ba la dep, hynrei haduh mynta ym pat iohi wat tang ia ka Sunction Order jong kane kane ka surok, “La Ong u bah Charles”.
Shuh shuh u Bah Charles u la ong ruh, watla u dei u MLA u ba don ha ka liang pyrshah , hynrei ki kam pynroi ki dei ban wan namar kadei ka hok bad ka jingmyntoi jong ki paidbah, u la ithuh ruh ba ha ka jingialang la rai, ma u lem bad baroh ki Khlieh Nongsynshar Shnong jong ka Mawrong Road Area lem bad ki San tylli ki Shnong na ka Thain Mawtari Thaiang kin sa pynlong ia ka jingleit ia kynduh ia u Myntri ka Tnad PWD Road bad kumjuh ruh ia ka Myntri ba dei Khmih ia ka tnat ka Koit ka Khiah sha Secretariat ha Nongbah Shillong. Nalor u surok bad kiwei kiwei ki mat kiba la dep ban ïa thir, u bah Charles Marngar u la pynpaw ruh ba kine ki shnong ki la donkam ruh ban ïoh noh ïaka PHC kaba dei jaka ai jingsumar ia ki ba pang ba shitom namar lada ïa nujor ïaka jingbun paidbah jong kine ki shnong ka ladei hok ïaki ban ïoh noh ïaka PHC khnang ba ki paidbah jong katei la thaiñ kin suk ban phah sumar ïaki ba pang kiba shitom.
