U Myntri Rangbah ka Jylla u Conrad K. Sangma, ula ialam ia ka kynhun ki nongrep ba 19 ngut kynthup 10 ngut ki nongseng kam lajong na Meghalaya ryngkat ki ophisar ba shim bynta ha ka tamasa sohtrun ha Dilli Haat, New Delhi dang shen ha Rashtrapati Bhavan, ka jaka sah jong ka President ka Ri India ha nongbah New Delhi. Katei ka kynhun ba kynthup 19 ngut ki nongrep bad hapoh ka jingialam u myntri rangbah, 10 ngut ki nongseng kam jong ka jylla Meghalaya bad ki heh ophisar ka sorkar jylla. U Conrad Sangma ula ong, “Ka Sorkar Meghalaya ka ju ïatreilang beit bad ki nongrep, kiba long u budlum jong ka ïoh ka kot jong ka jylla. Kane ka jingjia, hadien ka ka jingjop jong ka tamasa sohtrun 2024, ym tang ba ka ithuh ia ka jingtrei shitom jong ki hynrei ka pynshlur ruh ia ki ban kiew sha ki kyrdan kiba hajrong”. Ula kren ruh shaphang ka jingïatylli jong ka jaidbynriew, kaba pyni ba ka jingdon jong ki nongrep Meghalaya ha ka Rashtrapati Bhawan kadei ka mat jong ka jingsarong, kaba pyni ia ka jingiatylli jong ka jaitbynriew.
Ki nongrep jong ka jylla ki la leit jngoh ruh ia ka ‘Janjatiya Darpan’, ka art bad ka kolshor jong ki riewlum ha ka Rashtrapati Bhawan, kaba la plie da ka President ka ri India ka Droupadi Murmu. Ki nongleit jngoh kila dap da ka jingkmen ban iohi ia ki jingshna na ki mawkordor bad ki jingdeng ryndang jongki Khasi bad Garo jong ka Meghalaya kiba la pyni ha katei ka jaka bad kala don ruh ka jinglum jingtip kaba pura ia kine ki tiar, ryngkat bad kiwei pat ki jingthoh shaphang ki jaitbynriew bapher ha ka ri India. Ki nongrep bad ki nongsengkam, kiba leit jngoh ia ka Rashtrapati Bhavan ryngkat bad u Myntri Rangbah kila pynapw ba ki dap da ka jingsngewtynnad. Ka nongrep naka jylla ka Kong Badashisha Lapang, kala ong ba u myntri rangbah ula ju kyrshan man ala ka por ia ki nongrep bad dei na ka jingpyrshang jong ka sorkar ba ia ki sohtrun mynta la shalan shabar ri bad la bam ruh ia ki ha kylleng ka pyrthei.
Katba ka Robina J Sangma, ka nongseng kam sengjam na ka PRIME (Promotion and Incubation of Market Driven Enterprises), Meghalaya kala ong, u Myntri Rangbah uba la synran ia ki sha ka jingleit jngoh ia ka Rashtrapati Bhavan bad kane kala pynskhem iaki ba kin ioh beit ia ka jingkyrshan na ka sorkar. U Bah Cyril V. D. Diengdoh, ula pynpaw ia ka jingaiti ka sorkar jylla ha ka jingroi ka rep ka riang bad ong, ba ka jingleit jngoh ka long ka jingkdew jong ka jingkular jong ka sorkar ban pynshlur ia ki nongrep ban wad shuh shuh ia ki lad ki lynti na ka bynta ka jingroi bad jingpyniar shuh shuh ia ka.
