Khyndai ngut ki briew ki la duh ei ia ka jingim ba kordor bad 30 ngut ki la mynsaw ha ka jingjia takhuh ki rel ha Siliguri, West Bengal hynne ka step lah sngi U Blei.Ka khubor ka iathuh ka rel Kanchanjunga Express ba kit ia ki briew ka la shah tynrah nadien hakwei ka rel ba kit marbam haduh ba saw bynta jong ka rel kit briew bad san bynta jong ka rel kit mar ki la pra. Ka Sealdah-bound Kanchanjungha Express ka la mih na Tripura, Agartala hynnin ka sngi U Blei ban leit sha Sealdah station ha Kolkata, hynrei ka la shah tynrah noh ha ka rel kitmar hapdeng ka Raninagar bad Chaterhat station hapoh ka Katihar division jong ka NF Railway.U Chairman bad CEO ka Railway Board u Jaya Varma Sinha, ula ong, kane ka la jingjia ka la jia na ka daw bym phikir ia ki jingai dak ia ka jingiaid ki rel kaba wanrah ka jingjia takhuh ki rel bad ka jingtohkit halor kane ka jingjia ka dang iaid shakhmat.
U Myntri Railway ka sorkar pdeng, u Ashwini Vaishnaw ula pynbna ha ka X ban ai jingiarap T.10 lak ia kiba iap, T.2.5 lak ia kiba mynsaw jur bad T.50,000 ia kiba mynsaw malu mala.Ha kajuh por u Myntri Rangbah Duh, Narendra Modi u la ai phah ka jingsngewlem sha kiba iing kiba iap. Ula ong ki jingpyrshang ban pyllait im ia ki briew ka dang iaid shakhmat kumjuh ban ai jingiarap ia kiba la don ha kane ka jingjia bad u Myntri ka Tnat Rel, Ashwini Vaishnaw u dang leit sha katei ka jaka ba jia. Ka Ophis U Myntri Rangbah Duh ka la pynbna ban siew bai lutksan T.2 lak na ka PMNRF sha kiba haiing kiba iap bad T. 50,000 ia kiba la mynsaw.
U Myntri Rangbah Duh u la post ha ka X; Ka jingjia aksiden ka rel ha West Bengal ka long kaba sngewsih. “Nga phah ka jingsngewlem sha kiba haiing jong ki. Nga duwai ba kito kiba la mynsaw kin ioh jingkoit jingkhiah kham kloi. Nga la iakren bad ki ophisar ba kin peit ia ki jinglong jingman. Ki jingpyrshang ban pyllait im ia ki briew ki la iaid shakhmat bad ruh ka jingai jingiarap ia kito kiba la don ha kane ka jingjia aksiden” ula ong. Na kane ka jingjia 9 tylli ki rel ki la hap ban sangeh ha ki station rel kynthup ka Dibrugarh New Delhi Rajdhani, Express, Howrah New Jalpaiguri Vande Bharat Express la phah iaid noh sha stetion New Jalpaiguri -Siliguri- Bagdogra-Aluabari. Bun ki rel ha Guwahati, Agartala bad ka thain lammihngi ki lah hap sangeh ha ki station bapher kum ha Barsoi-Jalpaiguri.
