Ar ngut ki khynnah shynrang uwei ba dang 10 snem bad uwei pat 11 snem ka rta ki la iap jyllop hynne ka sngi u Blei ha kawei ka pung umdih ba dang shuh dep tih dang shen bad bym pat dep shna pynbha.
Kane ka jingjia ka la jia ha ka shong Sohmynting, West Jaiñtia Hills District kaba jngai kumba 12 Km ei ei na sor Jowai kaba dei ka District Headquarter jong ka West Jaiñtia Hills District.
Katkum ka khubor ba la ioh lum la ong ba ha ka por kumba 12 baje ei ei mynsngi saw ngut ki khynnah ki la leit sha katei ka pung hynrei ar ngut ki la kynthih shapoh um katba ar ngut pat ki shuh sum khlieh.
Hadien ba ar ngut na ki kiba shu sum khlieh ki la iohi ba ki khlem mih shuh napoh um, mar mar ki la leit iathuh briew, bad ki paidbah ruh ki la poi ban ai jingiarap.
Hynrei namar ba ka um ka la ktieh bad jylliew ki paidbah ki shem jynjar ban wad, kumta kham hadien ki la phah wan da ka JCB ban pynlait lynti ia ka um ban tuid bad ynda la kham stang ka um ki sa lap ia baroh ar ki khynnah ba ngam jyllop.
Kine ki khynnah ba iap jyllop dei u Sambud Suting 10 snem ka rta, khun jong ka kong Pynshngaiñ Suting bad u Chiruplang Ryngkhlem, uwei pat ba kyrteng u Armiki Suting 11 snem ka rta khun jong ka kong Rida Suting bad u Shngaiñ Pyrtuh.
